Actualizado 30/03/2019 12:19

La XDLA afirma que la manifestación pola oficialidá del 6 d'abril va ser "histórica"

La XDLA afirma que la manifestación por la oficialidad del 6 de abril va a ser "
EUROPA PRESS.

UVIÉU, 30 Mar. (EUROPA PRESS) -

La portavoz de la Xunta pola Defensa de la Llingua Asturiana (XDLA), María Xosé Martínez, afirmó que la manifestación pola oficialidá del asturianu y del gallego-asturianu convocada pa esti 6 d'abril en Xixón va ser "histórica" al igual que la celebrada hai un añu n'Uviéu, onde participaron 30.000 persones.

L'asociación presentó esti sábadu n'Uviéu la marcha arropaos por una decena de les asociaciones qu'apoyen la convocatoria. La manifestación va salir a les 18.00 hores de la Plaza de L'Humedal p'acabar na Plaza Mayor, pero a lo llargo de la mesma va haber bandes de gaites, pandereteres y el dj Dani Stylo pa amenizar el percorríu.

Per otru llau, al llegar a la Plaza Mayor de Xixón, la presentadora Sonia Fidalgo y l'actor José Antonio Lobato van ser los encargaos de lleer el manifiestu final. Depués, va haber un conciertu de Marisa Valle Roso y del dj Fruela 757.

Martínez esplicó que la marcha busca "acabar cola discriminación y marxinación" que viven los asturianofalantes, polo qu'esperen una movilización "histórica" pa consiguir "un derechu que se ta negando y que la ciudadanía reclama".

Nesi sentíu, destacaron l'éxitu de les campañes d'apoyu a la convocatoria al traviés de les redes sociales, como la grabación de videos col hashtag #OficialidaChallenge, o'l "apoyu enorme" de sindicatos y asociaciones na organización de la manifestación p'asina "volver enllenar les cais de dignidá".

Dende la XDLA aseguraron que ta movilización "va ser histórica como la del añu pasáu, probablemente tovía más, depués de 30 años na cai defendiendo'l nuestru patrimoniu llingüísticu".

Asturianu ofrecido por