UVIÉU, 2 Dic. (EUROPA PRESS) -
La Xunta pola Defensa de la Llingua Asturiana (XDLA) calificó esti miércoles de "continuistes y decepcionantes" les partíes dedicaes a la política llingüística nel proyectu de presupuestos autonómicos pal 2021.
"Sabemos de la escepcionalidá del momentu derivada de la situación sanitaria, pero tamién conocemos el papel de reactivación económica que podía xenerar una industria cultural potente basada na especificidá llingüística del nuestru territoriu", indicó la organización al traviés de nota de prensa.
Nesi sentíu, indicaron que nes cuentes "sigue faltando" una política de normalización llingüística "ambiciosa con recursos humanos y medios económicos". Amás, emponderen los "xestos de política llingüística tresversal nes campañes institucionales de los últimos meses" que demuestren "que se pue facer normalización dende otros departamentos del Gobiernu ensin un gastu significativu mayor".
"Pero una política llingüística decidida, la necesaria pa una situación crítica del patrimoniu llingüísticu asturianu como l'actual, tien qu'implicar necesariamente un aumentu curiosu de les partíes presupuestaries dedicaes a ella", señalaron.
SERVICIU ASTURIANU DE DOBLAXE
Per otru llau, la XDLA volvió criticar que les cuentes incluyan una partida de 100.000 euros --30.000 más qu'anguaño-- pa la promoción del asturianu na RTPA. "Quier dicise, Política Llingüística tien que paga-y 100.000 euros a la RTPA porque con 24 millones d'euros parez que nun-y algama pa cumplir lo que tenía que ser el so deber", señalaron
Por eso, reclamen esa partida pal doblaxe de películes, series y programes al traviés d'un conveniu de collaboración cola RTPA u la creación del Serviciu Asturianu de Doblaxe y Traducción. "Esta entidá taría encargada de coordinar los doblaxes y subtitulaos y supervisar los trabayos de les empreses, amás d'avalar el so modelu llingüísticu", sentencien.
