Proponen qu'asturianu y gallego-asturianu tengan la mesma consideración y que sía una llei la que declare les zones d'usu
UVIÉU, 15 Oct. (EUROPA PRESS) -
La Xunta pola Defensa de la Llingua Asturiana (XDLA) afirma que nestos momentos nun tien sentíu falar de modelos d'oficialidá porque "mecer el debate con propuestes nel aire sobre les polítiques llingüístiques futures nun lleva a otro qu'a la confusión".
Asina se pue ver nun documentu al que tuvo accesu Europa Press onde la principal organización de reivindicación llingüística analiza la situación actual del debate sobre la oficialidá y los sos antecendentes.
Nél, la XDLA vuelve a felicitase pol determín de Podemos Asturies y Izquierda Xunida d'abrir una reforma del Estatutu d'Autonomía pa reconocer l'asturianu y gallego-asturianu como llingües oficiales, pero agora quieren recordar qu'esi reconocimientu "nun implica directamente l'aplicación de polítiques llingüístiques".
Asina, según la organización, "nun tien xacíu falar de modelos d'oficialidá" porque les llingües "o son oficiales o nun lo son", polo qu'espliquen que ye una llei posterior de normalización la que detalla l'alcance en tolos ámbitos sociales d'esa oficialidá y que va ser el Gobiernu l'encargáu de la xestión posterior de la política llingüística.
"La xestión posterior de la política llingüística, como la xestión de cualquier otru serviciu públicu, va ser meyor o peor, más avanzada o más ruina, con meyores o peores resultaos económicos según el criteriu políticu de quien tenga la responsabilidá de gobiernu", espliquen.
Per otru llau, recuerden quen 35 años de democracia, nes seis comunidaes autónomes con llingua propia oficial diferente del castellanu, anque haya diferencies sobre la política llingüística, nengún grupu parllamentariu propunxo nunca la eliminación de la oficialidá. "Esto demuestra que, ellí onde ta reconocida, el consensu sobre los efectos positivos de la oficialidá ye total", indiquen.
PROPUESTA D'ARTÍCULU 4
Otra manera, la XDLA apurrió a primeros del añu 2018 una propuesta de redacción del artículu 4.u del Estatutu d'Autonomía d'Asturies "trabayada coles suxerencies de dellos xuristes espertos na materia".
Nél, la organización propón recoyer que tanto l'asturianu como'l gallego-asturianu, tienen, col castellanu, el calter de llingües oficiales y que los poderes públicos d'Asturies han garantizar el derechu a conoceles y usales.
Asina, quieren que se recueya que va ser una llei de la Xunta Xeneral la qu'ha establecer los términos y ámbitos del usu oficial de les llingües propies d'Asturies "y ha fixar les zones d'usu predominante d'entrambes".
P'acabar, nel artículu propuestu falen de que nenguna persona va poder ser discriminada n'Asturies pola llingua que llibremente escueya pa comunicase.
