UVIÉU, 18 Jun. (EUROPA PRESS) -
Esti sábadu 22 de xunu, representantes de la Xunta pola Defensa de la Llingua Asturiana (XDLA) y de la Plataforma pola Oficialidá del Gallego-Asturiano van tener un alcuentru en Tapia. Según esplicó la primer asociación, trátase del primeru d'una serie de contactos "pa reivindicar la oficialidá esta llexislatura".
"Esti conceyu abre una riestra de contactos con delles entidaes que van valir pa trazar y proponer acciones reivindicatives nel contestu nuevu que s'abre cola llexislatura y col Gobiernu que se va formar nunes selmanes", afirmen al traviés de nota de prensa.
Pa la Xunta, l'alcuentru en Tapia va suponer "una oportunidá pa compartir trabayu y reflexones qu'afecten y van afectar nel futuru próximu a les dos llingües propies d'Asturies".
