La Xunta pola Llingua convoca una manifestación pa pidir la mención d'asturianu en Maxisteriu y la especialidá docente

Actualizado 17/02/2009 18:59:05 CET

UVIÉU, 17 de Febreru (EUROPA PRESS)

La Xunta pola Defensa de la LLingua Asturiana convocó güei una manifestación contra "la esclusión de la llingua asturiana nel sistema educativu", na que va pidir que s'apruebe una Mención d'asturianu na reforma de los estudios de Maxisteriu y la creación de la especialidá pa que se convoquen les places de profesores de llingua asturiana n'educación primaria y secundaria.

Al traviés d'un comunicáu, la Xunta fizo pública la convocatoria d'esti actu, que tendrá llugar el próximu 7 de marzu, sábadu, de magar les 17.00 hores, n'Uviéu. La marcha va salir de la estación de Renfe, pero en llugar d'acabar nos llugares habituales (plaza Porlier o Plaza la Catedral), va facelo na Plaza España, na que s'asitia la Conseyería d'Educación del Gobiernu asturianu.

Nel comunicáu, la Xunta esplica que "l'intentu d'eliminación de la llingua asturiana nos planes d'estudiu de la Escuela de Maxisteriu, y la situación irregular y illegal na que s'atopen los docentes y l'asignatura d'asturianu, obliguen a la movilización na defensa de los derechos llingüísticos y educativos énte unes agresiones qu'amenacen con un pasu p'atrás de más de diez años na enseñanza de la llingua".

Sobre'l tema de Maxisteriu, recuerda que l'anterior propuesta de reforma, que nun incluyía l'asturianu ente la llista de menciones (especialidaes) salió refugada por una amplia mayoría, y agora la direición de la escuela va tener que presentar una alternativa. "Pel momentu nun se conoz, pero'l silenciu per parte de la dirección oblígamos a movilizamos na defensa d'unos planes d'estudiu qu'han incluyir: una mención de Llingua Asturiana que substituya al títulu actual d'Espertu en Llingua Asturiana; y les asignatures comunes de llingua asturiana nes especialidaes d'Educación Primaria y Educación Infantil que garanticen a tolos docentes la formación imprescindible pa trabayar na realidá sociollingüística de les escueles d'Asturies".

Per otra parte, señala "la sentencia del Tribunal Supremu que califica d'illegales a les plantiyes funcionales de docentes, dexa nun limbu llegal a los maestros y maestres de llingua asturiana qu'hasta agora exercíen dientro d'esi formatu". "Ye necesario", según la xunta, "que se dignifique y normalice la situación llaboral irregular de los maestros d'asturianu, que-yos reconozan los mesmos derechos y deberes qu'al restu docentes, y que se cumpla la llei que reconoz que los escolinos y escolines qu'estudien asturianu van tener la mesma formación que los demás y que nunca llegó a aplicase na enseñanza secundaria".

El colectivu entiende que "l'asignatura de llingua asturiana ye parte del currículu y polo tanto debe tener la so propia especialidá, igual que'l restu materies que s'imparten n'escueles y institutos y ha ponese clase nes mesmes condiciones". "La non creación d'esta especialidá solo podría significar una cosa, la intención de les alministraciones de caltener l'asignatura nuna posición marxinal y inestable que permita la so eliminación nun futuru próximu", acaba'l testu.