UVIÉU, 1 Feb. (EUROPA PRESS) -
La Xunta Xeneral va celebrar cuatro plenos ordinarios no que resta de llexislatura hasta'l 29 de marzu, según el calendariu alcordáu esti miércoles na Xunta de Portavoces énte la convocatoria d'elecciones autonómiques pal 28 de mayu.
Un calendariu con plazos llimitaos pa l'actividá llexislativa del parllamentu ente crítiques dende dellos partíos de la oposición pola "galbana" llexislativa del Gobiernu del Principáu na llexislatura, resaltando qu'hasta la fecha hai 14 lleis aprobaes, de les que cuatro foron los presupuestos anuales.
Tanto PP como Podemos y Foru foron críticos cola iniciativa llexislativa escasa del Executivu del socialista Adrián Barbón en declaraciones a los medios al acabar la Xunta de Portavoces, mentes que nun comparecieron nin Ciudadanos, nin IX, nin Vox nin el Grupu Mistu.
Dende'l PSOE, la portavoz, Dolores Carcedo, esplicó l'alcuerdu alcanzáu pe fixar el calendariu ordinariu de comisiones y plenos d'esti últimu periodu de sesiones de la llexislatura que va empezar la selmana que vien coles comisiones d'Alministración Autonómica, Presidencia, Facienda, Industria y Educación. El primer plenu va celebrase los díes 14 y 15 de febreru y el cuartu y últimu va ser el 28 y 29 de marzu.
Carcedo señaló que tamién se van celebrar esta selmana les ponencies pa la tramitación de los proyectos de llei d'Empléu Públicu y de calidá Ambiental pa entainar cola xestión alministrativa, la primera con más de 200 enmiendes y la segunda con más d'ochenta. Espera qu'en dambos casos puedan algamar los alcuerdos pa llevales bien ceo a plenu y llograr la so aprobación.
Pa la portavoz del PP, Beatriz Polledo, hai que destacar la "poca actividá llexislativa" d'esta llexislatura, de la que culpa al Gobiernu autonómicu, reprochando que de 37 lleis previstes malapenes tean aprobaes 14.
Espera la parllamentaria 'popular' la meyora nes selmanes próximes en delles de les lleis qu'hai en tramitación, especialmente n'Empléu Públicu y Calidá Ambiental, anque cree que "nun van solucionar los problemes de burocracia enguedeyada d'Asturies".
Dende'l PP, igualmente, aseguren que van intentar sacar alantre "dalguna llei bona pa los asturianos" nos dos meses próximos, de la que criticaron al presidente que lleve tiempu "alloñáu de la realidá" pa tar "dedicáu a la campaña".
Ente los asuntos que van centrar la oposición del PP nesti últimu periodu de sesiones, Polledo resaltó la esmolición del so grupu pola evolución del desempléu na comunidá y la esplicación que va pidir al Gobiernu sobre un informe col que'l Principáu trata de xustificar los datos que evidencian la "decadencia" socioeconómica d'Asturies.
Rafael Palacios (Podemos), amás de duldar de la capacidá de xestión del Principáu pa garantizar el serviciu de tresporte a los Centros de Día, criticó que la producción llexislativa d'esta llexislatura dexa asuntos "pendientes", mentando la llei LGTBI o la llei de vivienda.
"Hai pocu tiempu y compromisos que nun va avagar cumplir", apuntó'l portavoz de la formación morada na Cámara autonómica, añadiendo que'l Gobiernu foi "pocu activu" pa tramitar lleis fundamentales. Tamién confirmó que'l so grupu va facer "lo posible pa que llei de Calidá Ambiental nun s'apruebe porque ye mui lesiva".
Per otru llau, el portavoz de Foru, Adrián Pumares, mostró optimismu en que salgan alantre les lleis d'Empléu Públicu y de Calidá Ambiental con enmiendes qu'ameyoren los testos presentaos pol Executivu, al considerar que son "lleis necesaries".
Sicasí, afeó una "galbana llexislativa esmolecedora" del Gobiernu del Principáu con "malapenes nenguna llei" nos cuatro años de llexislatura y unos "socios preferentes" na esquierda parllamentaria que "faen lo posible pa evitar que la llei de Calidá Ambiental salga alantre".
Pumares, que va incluyir nel so llabor d'oposición l'amenorgamientu de trámites burocráticos y l'alta velocidá ferroviaria, mostróse esmolecíu pola falta de tiempu p'aprobar ente febreru y marzu otres lleis que taben comprometíes como tases, derechos LGTBI o emerxencies. "Pensamos que yera imposible un gobiernu más perezosu que'l de Javier Fernández pero lo superó en demasía", dixo sobre l'Executivu d'Adrián Barbón.
