UVIÉU, 6 May. (EUROPA PRESS) -
El coordinador xeneral d'IX aseguró esti domingu, depués del anunciu del presidente Adrián Barbón, de convocar a los grupos parllamentarios pa llograr un consensu sobre la oficialidá del asturianu que "espera que'l procesu negociador permita la reforma estatutaria" y valora que'l marcu "sía namás pa falar del asturianu y non de cuestiones ayenes a la llingua". "Ye'l momentu de que toos pasemos de les palabres a los fechos", indicó.
El coordinador xeneral d'IX, Ovidio Zapico, defendió reactivar les negociaciones ente les distintes fuercies pa llograr la oficialidá del asturianu. Fíxolo na so visita a la Feria de Tinéu, onde recordó que'l so partíu reivindicó, históricamente, la reforma llexislativa pa dar a l'asturianu la consideración máxima. "Somos el partíu decanu na defensa de la oficialidá", dixo.
Con too, aseguró que la formación va tar en toles meses de negociación que puedan abrise y qu'agora toca testar cuál ye la posición real de caúna les formaciones polítiques.
"Ye'l momentu pa que toos pasemos de les palabres a los fechos. Tenemos esa oportunidá: si tanto queremos l'asturianu y tanto lo dicimos defender, yo creo que'l marcu xurídicu meyor pa que eso sía una realidá ye al traviés de la declaración de la oficialidá al amparu de la reforma del Estatutu d'Autonomía", indicó Zapico.
Amás, según Zapico, el marcu anunciáu pol presidente, Adrián Barbón, sobre tratar "con calter esclusivu , la reforma del Estatutu, ye lo necesario. "Nun pueden introducise otros elementos que dieron al traste la negociación hai dos años. Con eses premises, Izquierda Xunida va dir col meyor de los sos ánimos como, dicía, dende hai décades llevamos defendiendo", añedió.
Agora, al so xuiciu toca saber el grau de determinación de les distintes fuercies. "Nun val tar echando la gata al gatu nin andar mareando. Y yo creo que nesa primer xunta tien que quedar bien claro la voluntá de les fuercies polítiques; de si vamos en serio con esto o si namás queremos falar de cara a la galería y, depués, cuando principien los procesos políticos nos qu'hai que tomar decisiones, echanos p'atás. Izquierda Xunida Convocatoria por Asturies nun se va echar p'atrás, tamos cola oficialidá", concluyó.
