UVIÉU, 05 d'Avientu (EUROPA PRESS)
El conseyeru d'Economía y Empléu, Graciano Torre, refirióse esti vienres a les últimes noticies de la empresa Alcoa, que manifestó que va siguir coles sos plantes n'Avilés (Asturies) y A Coruña (Galicia) si s'ufierta una solución a la so tarifa eléctrica. A xuiciu de Torre, la respuesta a esta situación nun pue ser puntual, sinón que'l Gobiernu central tien que dar "estabilidá al sistema".
Alcoa anunciara despidos colectivos n'Asturies y Galicia por cuenta de que la última puya d'enerxía nun cumplió coles sos espectatives. Agora, el Gobiernu central anunció una segunda puya y la compañía decidió esperar a los resultaos.
Torre, a preguntes de los periodistes nel pasiellu de la Xunta Xeneral del Principáu d'Asturies, esplicó que l'Executivu asturianu lleva dende va tiempu diciendo "por activa y por pasiva" que ye necesaria una solución que dea esa estabilidá. "Si non, vamos tar añu tres d'añu con estes rocees", alvirtió.
Pero amás, dixo qu'un escenariu en que les empreses grandes consumidores d'enerxía instalaes n'Asturies, como Alcoa, ArcelorMittal o Asturiana de Zinc (Azsa), tengan que tar pendientes del preciu de la eletricidá cada ciertu tiempu torga que faigan inversiones. "Naide va facer una inversión que dientro d'un añu va tener la espada de Damocles enriba".
