UVIÉU, 6 de Payares (EUROPA PRESS)
El secretariu xeneral d'Industria de CCOO, Damián Manzano, encamentó al SOMA-Fitag-UXT a dimitir na Comisión Rexonal del Montepío de la Minería, con cuenta de favorecer "un nuevu ciclu" na mutualidá, a la lluz de les últimes noticies sobre l'ex presidente José Antonio Postigo y la so fía Patricia Postigo, a los que ta investigando la Fiscalía Anticorrupción por regularizar dineru.
Nuna rueda prensa'l líder d'industria de CCOO esplicó los motivos que llevaron a la Executiva Rexonal del sindicatu a pidir a los miembros de CCOO dientro de la Comisión Rexonal del Montepío qu'abandonen la mesma. La decisión acordóse "de manera unánime" pola Executiva Rexonal de Comisiones Obreres y "aceptada" por tolos miembros del sindicatu que participaben hasta agora nel Montepío. "Dimitimos p'animar al restu a que seyan impulsores del nuevu procesu con "lluz, tresparencia, osíxenu y claridá", señaló.
Esta dimisión nun implica que CCOO dexe de ser "sociu protector" de la mutualidá minera, polo que Manzano mostró'l compromisu de la so organización na abertura d'un "nuevu ciclu" nel Montepío que valga pa esclarar too aquello que "empuerca la bona imaxe" de la organización.
Trátase, n'opinión del representante sindical, "d'una decisión valiente y responsable" que CCOO tomó "ante l'usu de manera fraudulenta per parte del ex presidente del so cargu", porque se sienten "engañaos y estafaos" pol mesmu, y pa "facilitar el procesu y dar exemplu, animando al restu de miembros a que siga esti honrosu exemplu".
Per otru llau, negó qu'exista dalgún miembru de CCOO que regularizara dineru en nenguna amnistía fiscal. Asina, aseguró que dende'l sindicatu nun tienen "nenguna duda" sobre les actuaciones de los miembros de CCOO nel Montepío. "Los nuesos despachos, meses, caxones y alfombres tán abiertos", insistió.
