UVIÉU, 06 de Mayu (EUROPA PRESS)
Diputaos y estudiantes del IES Santa Cristina de L.lena tomaron parte esti martes nel actu institucional de la Selmana de Les Lletres Asturianes, nun plenu nel que se lleeron testos de dellos autores en llingua asturiana.
L'actu, presidíu pol máximu responsable de la Xunta, Pedro Sanjurjo, que realizó toles sos intervenciones n'asturianu, contó tamién cola participación de la directora xeneral de Política Llingüística, Ana Fueyo, el viceconseyeru de Cultura, Alejandro Calvo, y la presidenta de l'Academia de la Llingua, Ana Cano. Toos ellos tuvieron na mesa, xunto col alumnu más mozu y el más veteranu de toos.
El presidente de cámara foi llamando a los intervinientes. Los diputaos que subieron al estráu fueron, pol PSOE, Pilar Alonso y Marcelino Marcos Líndez; por Foru Asturies, María del Mar García Poo y Manuel Peña; pol PP, Alfonso Román y Matías Rodríguez Feito; por Izquierda Unida, Noemí Martín y Emilia Vázquez; y por UPyD, Ignacio Prendes.
Tamién subieron al estráu los estudiantes Irene Alonso Dorrego, Ruth García, Aitana Konstantynoswky López, Manuel Muñiz Tomillo, Juan Francisco Pérez Santos y Abraham Prada del Corro.
Testos de Manolo García 'El Galano', Marta Mori, Pablo Texón, Berta Piñán, Marisa López Diz y Xuan Bello ente otros recitáronse ente los aplausos de los asistentes.
Antes del actu institucional, los alumnos del IES Santa Cristina tomaron parte nuna visita pol parlamentu guiada en llingua asturiana por Xuan Santori.
