BILBO, 2 (EUROPA PRESS)
Eusko Jaurlaritzako Berdintasun, Justizia eta Gizarte Politiketako Sailak 'Erdu' programa indartu du baliabideak gehituz. Hain zuzen, ia %50 gehitu du programaren jarduerari erantzuteko aurrekontua, eta iazko 250.000 euroetatik aurtengo 370.798 euroetara pasatu da (%48,32 gehiago). Pandemia betean sortu zen programetako bat da, eta adikzioak eta behar soziosanitarioak dituzten, baliabide tradizionaletatik aldenduta dauden eta arreta espezializatua jaso ezin duten pertsonen egoera hobetzen laguntzea du helburu.
Jaurlaritzatik jakinarazi dutenez, Euskadiko lau gizarte erakunde elkartu ziren 'Erdu' proiektua bultzatzeko, eta proiektuan lanean jarraitzen dute hiru lurraldeetara hel dadin: Gizakia Fundazioa, Jeiki Fundazioa, Etorkintza Fundazioa eta Agipad Gipuzkoako drogen abusuaren ikerketa eta prebentziorako elkartea. Lau erakundeek ikuspegi integral eta osagarri batetik heltzen diote berariaz adikzioen arazoari.
Programaren helburua da pertsonaren inguruan sistema ezberdinen baliabideak elkarlotzea (oinarrizko gizarte zerbitzuak, osasun mentaleko zentroak, bigarren mailako arretako zentroak, aterpetxeak, exijentzia txikiko zentroak, Ertzaintza, Lanbide eta abar). Modu horretan, gatazkak murrizten, sistemen eta baliabideen artean pertsonen fluxua hobetzen eta pertsona zaurgarrienek euren eskubideak baliatzeko dituzten aukerak areagotzen laguntzen da.
Nerea Melgosa Berdintasun, Justizia eta Gizarte Politiketako jarduneko sailburuak aste honetan sinatu ditu Gizakia Fundazioak eta Jeiki Fundazioak 'Erdu' programarekin lotuta Bizkaian eta Araban egiten duten jarduera finantzatzeko aginduak. Datozen egunotan Etorkintza Fundazioak eta Agipad elkarteak jasoko dute diru laguntza.
Euskadin adizioak dituzten eta gizarte zaurgarritasuneko egoeran dauden pertsonei arreta emateko hurbileko arreta komunitarioko programa 'Inor Atzean Utzi Gabe' funtsaren esparruan sortu zen, covid-19ak eragindako pandemiaren itxialdi betean, 2020ko udaberrian. Funts horretatik zortzi programa sortu ziren, pandemiak eragindako edo areagotutako arrisku, bazterkeria edo pobrezia egoerei erantzuteko.
Programa horiek, 'Erdu' barne dela, Eusko Jaurlaritzaren eta Euskal Autonomia Erkidegoko Hirugarren Sektore Sozialeko erakundeen arteko lan partekatu baten ondorioz sortu ziren; Euskadiko Elkarrizketa Zibileko Mahaiko bazterkeriaren aurkako batzordeak detektatu zituen egoera horiek eta gizarte erakundeek garatu zituzten programak.
'Erdu' eta 'Aukerak Suspertzen' desabantaila sozialean dauden eta hezkuntzako eta ikaskuntzako prozesua jarraitzeko zailtasunak dituzten adingabeen premiei erantzuteko programa izaera estrukturala izatera iritsi dira, testuinguru jakin batean sortu arren, eta, mantentzeaz gain, denborarekin indartuz ere joan dira.
2023
Iaz, 'Erdu' programaren bidez 303 pertsona artatu ziren, eta horietatik 199 kasu berriak izan ziren. 2022an, urtebete lehenago, 270 izan ziren programaren onuradunak, eta 2023an, beraz, kasuen igoera %12koa izan zen.
'Erdu' programa sustatzen duten lau erakundeak Euskadiko 49 udalerritan aritu ziren 2023an, eta 2022koak baino sei gehiago izan ziren. Esku hartzeei eta koordinazioei dagokienez, 2023ko memoriaren arabera, gora egin dute bi kasuetan: esku hartzeek %47 egin zuten gora (6.716tik 9.881era), eta koordinazioek %18,20 (2022an 1.880 egin ziren, eta 2023an 2.222).
Programak arreta emateko unitate mugikor espezializatuen bidez funtzionatzen du, behar duten baliabideetara joaten dira, bertan egiten ari diren lanaren osagarri den adikzioen arreta eskaintzeko. Helburua da osasun eta hezkuntza arreta ematea, osasunaren eta gizartearen arloko zerbitzuekin koordinatuta, artatutako pertsonen osasun metala, egoera fisikoa eta psikologikoa hobetzeko.
Psikologia Klinikoko, Medikuntzako, Erizaintzako eta Psikiatriako, Gizarte Laneko eta Gizarte Hezkuntzako profesionalek osatzen dituzte taldeak.
