DONOSTIA, 7 (EUROPA PRESS)
Audrey Diwan zuzendari, egile eta gidoilariaren 'Emmanuelle' film frantsesak inauguratuko du Donostia Zinemaldiaren 72. edizioko lehiaketa. Filma irailaren 20an emango dute, zuzendaria eta aktore nagusiak bertan direla, eta mundu mailako estreinaldia izango da.
Zinemaldiko iturriek jakinarazi dutenez, 'L'événement / Happening' filmarekin (2021) Veneziako zinemaldiko Urrezko Lehoia eskuratu zuen Audrey Diwanek Rebecca Zlotowski zinemagilearekin batera idatzi du 'Emmanuelle' filmaren gidoia.
Galdutako plazer baten bila ari den emakume bati buruzko istorioa da. Hong Kongerako negozio bidaia batean, askotariko pertsonekin topatuko da, besteak beste, behin eta berriz saihestuko duen Kei izeneko gizon batekin.
Emmanuelle Arsan idazleak sortutako izen bereko pertsonaian eta munduan inspiratzen da filma. 'Me Too' mugimenduaren osteko aroan, Audrey Diwanek 2023ko udazkenean filmatu zuen Hong Kongen eta Parisen "plazerraren esplorazio gisa" sortu duen 'Emmanuelle'. Noemie Merlant aktore eta zuzendariak intepretatzen du pertsonaia nagusia, eta Naomi Watts, Will Sharpe, Jamie Campbell Bower, Chacha Huang eta Anthony Wong ere ageri dira aktore zerrendan.
Audrey Diwanen debuta 'Mais vous êtes fous / Losing It' (2019) izan zen. Bere bigarren lana, 'L'evenement / Happening', 1960ko hamarkadan legearen kontra abortatu zuenekoa kontatzen duen Annie Ernauxen eleberriaren egokitzapena da. Frantziako talentu berriak hautatu zituen aktore talderako (Anamaria Vartolomei, Kacey Mottet-Klein eta Luana Bajrami), eta Veneziako Urrezko Lehoia, César sarietarako lau izendapen eta BAFTA sarietarako izendapen bat lortu zituen, besteak beste. Gainera, Diwan Donostia Zinemaldiko Sail Ofizialeko epaimahaiburu izan zen 2021ean.
'Emmanuelle' Chantelouve, Rectangle Productions eta Goodfellas etxeen ekoizpena da. Beta Fiction Spain arduratuko da filma Espainiako lurraldean zabaltzeaz, eta Donostia Zinemaldiko aurkezpenaren ondoren, irailaren 25ean estreinatuko dute Frantzian.
