BILBO, 18 Feb. (EUROPA PRESS) -
Bilboko Arriaga Antzokiak kontzertu bat antolatu du biharko, iluntzeko 20:00etan hasita, Carmelo Larrea musikari eta konpositore bilbotarra omentzeko. Omenaldian, euskal abeslari eta talde ezagunek parte hartuko dute, Larrearen abestiz osatutako programa bat eskainiz, Bilbao Philarmonia orkestrak lagunduta, Carlos Aragon maisuaren zuzendaritzapean.
Carmelo Larrea Deustun jaio zen, 1907an, leku hori Bilboko auzoa ez zenean. Kantu eta organo ikasketak egin zituen Jesus Guridirekin eta "No te puedo querer", "Dos cruces" eta "Camino verde" bezalako abestiak konposatu zituen. Abesti horiek betirako ospea hartu zuten Antonio Machin, Jorge Sepulveda eta Maria Dolores Praderaren mailako abeslarien eskutik.
Madrilen hil zen, 72 urterekin. Bere abestiak irrati-aparatu zaharretan entzun ziren, auzoetako patioetan, herrietako plazetan ospatzen ziren jaietan, igandeetako dantzaldien orkestrek jota.
Orain, Arriaga Antzokiak musikari eta bilbotar handiaren oroitzapena omendu nahi du, kontzertu batekin. Carmelo Larrea omentzeko, Arriaga Antzokiko eszenatokian abeslari hauek arituko dira larunbatean: Los Cinco Bilbainos, El Consorcio, Marfie Nogales sopranoa, Andeka Gorrotxategi tenorea, Los Mitos, Gurutze Beitia aktorea, Ainhoa Cantalapiedra abeslaria eta Kepa Junkera trikitilaria.
Kontzertuaren musika-zuzendaritzaz Carlos Aragon maisua arduratuko da, musika klasikoaren eta koplaren alorrean esperientzia zabala baitu. Bere zuzendaritzapean, Bilbao Philarmonia orkestrak Carmelo Larrearen musika joko du.
Kontzertuan 17 abesti kantatuko dira. Horien artean, gehien ezagutzen direnak egongo dira, hala nola "Están clavadas dos cruces" (Andeka Gorrotxategi), "Camino verde" (El Consorcio), "No te puedo Querer" (Los Mitos) eta "Bilbao" izeneko abesti oso berezi bat. Carmelo Larreak hil baino apur bat lehenago sortu eta orain arte inoiz ere interpretatu ez den "Bilbao" abestiaren erabateko estreinaldia izango da bihar, Arriaga Antzokiak antolatutako omenaldi-kontzertuan.
Carmelo Larreak berak abesti honen partitura bidali zion Los Cinco Bilbainos taldeari, beren ahotsa jartzea eskainiz, abestia grabatzeko. Proiektu hori ezin izan zen burutu azkenean, artista hilabete batzuk geroago hil baitzen. Orain, abesti hau aurreneko aldiz entzungo da Arriaga Antzokian.
