BILBO, 12 (EUROPA PRESS)
Covid-19 gaitzaren 1.409 kasu positibo berri aurkitu ziren asteazkenean Euskal Autonomia Erkidegoan (EAE), bezperan baino zortzi gehiago eta egindako proba guztien %8,6. Gainera, 132 gaixo zainketa intentsiboen unitatean (ZIU) daude, aurreko egunean baino bat gutxiago, Eusko Jaurlaritzako Osasun Sailak ostegun honetan jakitera eman duenez.
Zehazkiago, 16.338 test diagnostiko egin ziren asteazkenean Araban, Bizkaian eta Gipuzkoan (13.436 PCR eta 2.902 antigeno), eta horien guztien artetik 1.409 kasu positibo berri zenbatu: 126 Araban, 663 Bizkaian, 601 Gipuzkoan eta 19 EAEtik kanpo bizi diren pertsonetan.
Gaitzak lurralde historiko bakoitzean duen 14 eguneko intzidentzia tasa metatuari dagokionez, Arabak 100.000 biztanleko 551,58 kasuko tasa dauka, Bizkaiak 747,69 kasukoa eta Gipuzkoak 1.106,53 kasukoa. EAE osoko intzidentzia tasa 845,15 kasukoa da.
Arabako egoerari dagokionez, Agurainek (679,76 kasuko intzidentzia tasa), Gasteizek (551,29) eta Laudiok (605,07) eremu gorrian jarraitzen dute. Bizkaian, 5.000 biztanletik gorako 29 udalerri daude maila gorrian, eta Basauri (1.016,92), Bilbo (750,37), Erandio (851,96), Ermua (1.371,66), Etxebarri (881,99), Lekeitio (924,65), Santurtzi (936,75), Trapagaran (892,63) eta Zornotza (889,17) nabarmentzen dira, besteak beste.
Gipuzkoan, 5.000 biztanletik gorako 34 udalerri daude maila gorrian, besteak beste, Arrasate (1.459,79), Azkoitia (1.351,24), Azpeitia (1.315,18), Beasain (1.331,52), Bergara (1.826,18), Deba (1.524,33), Eibar (2.396,68), Hernani (1.593,96), Oñati (1.206,52), Pasaia (1.256,66), Urnieta (1.437,80) eta Villabona (1.490,01).
Azkenik, ospitaleen egoerari erreparatuta, covid-19aren ondorioz 73 pertsona erietxeratu zituzten asteazkenean, eta 132 gaixo zainketa intentsiboen unitatean (ZIU) daude, bezperan baino bat gutxiago. Gaitzaren birsorkuntza tasa 1,03 da EAEn (0,95 Araban, 1,07 Bizkaian eta 1,00 Gipuzkoan).
