DONOSTIA, 21 Jul. (EUROPA PRESS) -
Debagoieneko Ospitaleak Joint Commission erakundeak ematen duen nazioarteko ziurtagiria lortu du berriro, eta horrela, osasun zentroaren kalitate eta segurtasun maila altuen balioa nabarmendu dute. Joint Commission International mundu osoan osasun akreditazioan esperientzia gehien duen erakundea da, eta 50 urte baino gehiago daramatza osasun eta gizarte erakundeen kalitatea eta segurtasuna hobetzeko lanean.
Eusko Jaurlariotzako Osasun Sailak eta Osakidetzak jakinarazi dutenez, akreditazioa berritzeko ikuskaritza uztailaren 1etik 4ra bitartean egin zen. Hain zuzen, kanpo ebaluazio independentea egin zen, 1.400 estandar ingururen jarraipena burutuz.
Mundu osoko 20.000 erakunde inguruk dute Joint Commission erakundearen egiaztagiria. Aitorpena lortzeko, osasun laguntzaren kalitatearen eta pazientearen segurtasunaren inguruko edukiak ebaluatzen dira, bai eta prozesu klinikoetako arriskuen murrizketa eta kudeaketa dinamikoaren eta parte hartzailearen eredua ere.
Zerbitzuen eta asistentziaren kudeaketaz gain, beste alderdi batzuk ere neurtzen dira, besteak beste, pazienteen identifikazio zuzena; profesionalen komunikazioaren eraginkortasuna; arrisku handiko medikazioaren segurtasuna; osasun arretarekin lotura duten infekzio arriskuen murrizketa, eta erorketek pazienteetan eragindako lesioen arriskuen murrizketa. Horiek guztiak nazioarteko helburuak dira pazientearen segurtasunean.
PAZIENTEA
Arreta pazientean jartzen duten helburuak direla eta, zenbait alderditan multzokatzen dira, hala nola arretarako sarbidea eta haren jarraipena, ebaluaziorako eta arretarako eskubideak, anestesia eta arreta kirurgikoa, medikamentuen maneiua eta erabilera eta familiartekoak barne hartzen dituen hezkuntza.
Pazientearen segurtasunari buruzko nazioarteko helburuetako bat da osasun laguntzaren arlo arazotsuak agerian uzten dituzten eta ebidentzian edo adituen aholkuan oinarritutako irtenbideak identifikatzen dituzten segurtasuneko helburuak. Ahal den neurrian, pazienteen segurtasun helburuek erakunde osoan eragiten duten neurri sistematikoetan jartzen dute arreta.
Nekane Murga Osasun sailburuak nabarmendu duenez, "aintzatespen horren ondorioz, Euskadi buru da Europan, pazienteen onerako segurtasun-neurrietan". Horrela, sailburuak eskerrak eman dizkie Debagoieneko osasun erakundeko profesional guztiei haien inplikazioagatik.
Osasun Sailaren eta Osakidetzaren iritziz, segurtasuna kalitatea da, bai eta laguntza prozesuetako eraginkortasunaren oinarrizko euskarria ere; horregatik jotzen da 2013-2020 aldirako Osasun Planaren barruan lehentasunezko jarduketa ildotzat eta horregatik balioesten dira mota honetako aintzatespenak.
