BILBO, 1 Abr. (EUROPA PRESS) -
Ertzaintzako agenteek 20 urteko gizonezko bat atxilotu dute asteazken honetan, Bilbon, indarra erabiliz lapurreta egitea egotzita. Anta denez, atxilotuak bigarren eskuko produktuen denda bateko erakusleihoko kristala hautsi du eta gama altuko sakelako bi telefono eraman ditu, Eusko Jaurlaritzako Segurtasun Sailak jakinarazi duenez.
Goizaldeko 03:15 jota zirela, pertsona batek Ertzaintzari jakinarazi dio gizon bat bigarren eskuko produktuen saltoki bateko erakusleihoa jotzen ari zela, Alde Zaharreko Gurutze kalean, seguru aski lapurtzeko asmoz.
Ertzaintzako patruila bat bertaratu da, Dorrea kaletik, eta ustezko lapurraren deskribapenarekin bat zetorren gizon bat hurbildu zaio, baina, patruila ikustean, Tenderia kalera abiatu da korrika eta handik gutxira harrapatu dute.
Prebentziozko miaketan, agenteek Samsung markako gama altuko bi telefono aurkitu dizkiote. Telefonoek lapurretaren dendaren zigilua zuten. Bitartean, saltokira hurbildu den beste patruila batek jakinarazi du erakusleihoko kristalak hiru zulo handi zituela. Handik gutxira, agenteek jakin dute ustezko lapurrak kutxatila bat erabili duela erakusleihoa hausteko, eta gero edukiontzi batean bota duela.
Horregatik guztiagatik, ertzainek susmagarria atxilotu dute indarrez egindako lapurreta delitu bat egotzita, eta ertzain etxera eraman dute. 20 urteko gizon bat zela identifikatu dute bertan.
