BILBO, 28 (EUROPA PRESS)
Euskal Autonomia Erkidegoko (EAE) saltoki handietako eta elikadura kateetako salmentak %1,7 igo dira abuztuan prezio konstanteetan eta lan egutegiko baldintza homogeneoetan, aurreko urteko hil beraren aldean. Aurtengo uztailarekin alderatuta, prezio konstanteetako salmenten bilakaera ere positiboa izan da, %2,3ko igoerarekin urtaro eraginik gabeko terminoetan, Eustat euskal estatistika erakundearen datuen arabera.
Sektoreen arabera lortutako indizeak aurreko hilabetekoekin alderatuta, prezio konstanteetako igoera gertatu da elikaduran zein gainerako produktuetan, %2,0koa eta %3,1ekoa, hurrenez hurren.
Urte arteko aldian, berriz, prezio konstanteetako salmenten bilakaera negatiboa izan da elikaduran (-%0,1), eta gainerako produktuen salmentek, ordea, bilakaera positiboa izan dute, aurreko urteko abuztuan baino %5,0 gehiago, alegia.
Lurraldeen arabera, saltoki handietako eta elikadura kateetako salmentek gora egin dute abuztuan hiru lurraldeetan, urte arteko terminoetan: Gipuzkoan %2,4 igo dira, Araban %1,7 eta Bizkaian %1,2. Uztailarekin alderatuta ere salmentak igo egin dira hiru lurraldeetan: Araban %3,1 eta Bizkaian eta Gipuzkoan %2,2.
EAEko saltoki handietako eta elikadura kateetako langileen kopurua %1,9 gehitu da aurtengo abuztuan iazkoaren aldean, eta hilabete artean, aldiz, langileen indizea %0,3 igo da.
Bestalde, 2022ko lehen zortzi hilabeteetan, saltoki handietako eta elikadura kateetako salmenten indizeak %1,3 egin du behera. Elikagaietan metatutako salmenten %5,1eko jaitsierak eragin du berehakada, abuztura arte metatutako salmentak %6,8 igo baitira gainerako produktuetan.
Gainera, aurtengo aldakuntza metatua negatiboa da hiru lurraldeetan. Zehazki, Gipuzkoan eta Araban %2,7 gutxitu dira salmentak urteko lehen zortzi hilabeteetan, eta Bizkaian %0,1.
Azkenik, saltoki handietako eta elikadura kateetako sektoreko landunen indizeak %2,0ko hazkunde metatua izan du 2022. urteko lehenengo zortzi hilabeteetan.
