BILBO, 21 (EUROPA PRESS)
Energiaren Euskal Erakundeak (EEE) milioi bat euro banatuko du jabeen erkidegoetako banaketa sarearekin konektatutako barne sare elektrikoa hobetzeko laguntza berrietan, zerbitzu elektriko berriak ezartzeko ezinbesteko instalazioen modernizazioan eta sektorearen deskarbonizazioan aurrera egiteko asmoz.
Euskal energia erakundeak jakinarazi duenez, instalazio elektriko komunitarioen 200 berritze inguru babestuko dira laguntzen bidez, eta zenbatetsi da laguntzek 2,8 milioi euroko inbertsioak sustatuko dituztela lagundutako proiektuetan.
EEEren arabera, Europako erakundeen eta Euskadiko 2030erako Energia Estrategiaren ekonomia deskarbonizatzeko funtsezko oinarria da zenbait sektore elektrifikatzea, hau da, orain arte beste energia mota baten bidez eskuratzen ziren zerbitzuak kontsumo elektrikora pasatzea eta pixkanaka jatorri fosileko erregaien erabilera bertan behera uztea.
Ildo horretan, bizitegi sektoreak "zeregin nabarmena" daukala deritzo, sektorea deskarbonizatzeko ezinbestekoa baita kontsumo elektriko berriak ezartzea, adibidez, berokuntza sistemetan aerotermia bidez edo garajeetan ibilgailu elektrikoen kargaren bitartez. Era berean, eraikin horietan eguzki plaken bidezko energia berriztagarria ekoizte aldera, ekoizpen elektriko berri hori xurgatzeko gai den sare bat behar da.
Elektrifikazioaren arloan aurreikusitako garapen guztia kontuan hartuta, egiaztatu da jabeen erkidego ugaritako barruko banaketa sarea bere antzinatasunagatik ezegonkorra dela eta ez dagoela prest hainbeste energia garraiatzeko.
Zehazki, Euskal Autonomia Erkidegoko (EAE) etxebizitzen erkidegoen %23k instalazio zaharrak dituzte, 125/220 volteko sistemaz hornituak (B1 konexioa), baina gaur egun 230/400 volteko sistemak (B2 konexioa) behar dira auzotarren elektrizitate eskari gero eta handiagoari erantzuteko gaitasun nahikoa edukitzeko. Araban, erkidegoen %15ek dituzte instalazio elektriko ezegonkorrak, Bizkaian %28k eta Gipuzkoan %18k.
Babes lerro berriaren bidez, gabezia horiek arindu nahi dira 1999. urtea baino lehen eraiki ziren eta berritzea beranduenez 2024ko abenduaren 31ra arte burutu eta justifikatu duten eraikinetan. Laguntzok bateraezinak izango dira xede bera duten beste diru laguntzekin.
