BILBO, 12 (EUROPA PRESS)
Euskal Herriko Unibertsitateak (EHU) 11,3 milioi euro jaso zituen 2020. urtean ikerketa emaitzen transferentziaren bidez. Hala jakinarazi du Zientzia eta Gizarte Garapen eta Transferentziako Errektoreordetzari atxikitako Berrikuntza eta Transferentzia Zuzendaritzak, azken ekitaldian arlo horretan egindako jarduera guztia ebaluatu ondoren.
EHUk ikerketaren bidez sortzen duen ezagutza oro gizarteari helarazten zaio hiru bidetatik: irakaskuntzatik, dibulgaziotik eta ezagutzaren transferentziatik. Azken jarduera hori izango da, beharbada, egiten den arloetatik kanpo gutxien ezagutzen dena, nahiz eta garrantzi ekonomiko eta sozial handia duen.
Hala, unibertsitateak kontratuak sinatzen ditu era askotako eragile publiko eta pribatuekin (administrazio publikoak, enpresak, gizarte, kultura edo kirol elkarteak), ezagutza transferitzeko eta zerbitzuak emateko asmoz. Jarduera hori gero eta garrantzitsuagoa da gaur egungo unibertsitatean, eta euskal unibertsitate publikoak iaz 11,3 milioi euroko sarrera izan zuen kontzeptu horretan.
Atal honetan, datu esanguratsuenen artean, 1.169 ikerketa kontratu sinatu dira (%50eko hazkundea ekarri du azken sei urteetan). Gainera, lehentasunezko 31 patente berri eta, orotara, 75 patente sortu dira, errekorra aurreko urteekin alderatuta.
Lehentasunezko patenteak teknologia baterako lehenengoz babesa eskatzen duten patenteak dira. Patente hori erreferentzia gisa hartuta, babesa beste herrialde batzuetara heda daiteke hedakuntza patenteen bidez, eta horrelakoetan lehentasunezko patentea eskatu zeneko data hartzen da babes data gisa.
Lehentasunezko patenteak eta haren nazioarteko hedakuntza patenteek patenteen familia bat osatzen dute, eta multzo horrek teknologiak babesten ditu nazioarteko merkatuan. Joan den urtearen amaieran, EHUk beren patenteen familien bidez babestutako 208 teknologien zorro bat zeukan. Era berean, 2020an, 18 lizentzia kontratu sinatu ziren, EHUn sortutako teknologien ustiapen komertzialerako, eta hamar enpresa berri sortu ziren (spin-off), horietako zazpi oinarri zientifiko-teknologikokoak.
"URTE ONENETAKOA"
Halaber, ezagutzaren transferentziaren arloan, EHUren jarduera "kopuru nabarmenetara iristen ari da", eta 2020 "urte onenetakoa" izan zen jarduera horri dagokionez. Une honetan, euskal unibertsitate publikoak transferentzian aktibatuta dauden 200 ikerketa talde ditu, urtero era askotako 700 erakunde ingururi zerbitzua ematen dietenak.
Ekintzailetza lanei dagokienez, EHU gaur egun hiru ekintzailetza programa garatzen ari da, sei enpresa mintegi kudeatzen ditu, eta 43 negozio aukera ebaluatu ditu. Joan den urtean euskal unibertsitate publikoa hamar enpresa berriren harrobia izan zen.
Guillermo Quindós Zientzia eta Gizarte Garapen eta Transferentziako errektoreordeaern hitzetan, "2021. urtean beharbada covid-19aren pandemiaren eragina sumatuko badugu ere, 2020ko datuek erakusten dute EHUk konpromiso sendo eta iraunkorra duela kalitate handiko ezagutzaren sorrerarekin eta hura gizartera transferitzearekin".
"Gure taldea hurbilketa eta aholkularitza lan garrantzitsua egiten ari da hiru unibertsitate kolektiboetako kideekin, gurean sortutako ezagutza oparoa gure gizarteari helarazteko lanetan. Ezagutzaren transferentzia herritarrengandik jaso dugun inbertsioa itzultzeko tresna bat da, gizarte aberastasuneko ekarpen bat, eta garapen jasangarrirako helburuak lortzeko bultzada bat, helburu horiek datozen urteetan laneko lerro nagusietako bat osatuko baitute EHUn", adierazi du.
