BILBO, 17 (EUROPA PRESS)
ELA sindikatuko Nazio Batzordeak Mitxel Lakuntza proposatu du Adolfo "Txiki" Muñoz ordezkatzeko eta idazkari nagusi berri izateko. Izan ere, sindikatuaren araudiari jarraikiz, Muñozek 2019an bukatuko du agintaldia, adin kontuagatik. ELAko Nazio Batzordeak sindikatuko Batzorde Eragilea eta eskualdeetako eta federazioetako arduradunak biltzen ditu, eta berari dagokio proposamena egitea.
Dena den, sindikatuak jakinarazi duenez, idazkari nagusi berria izendatzeko erabakia ezohiko biltzar batean hartuko da, eta horretarako deia aste honetan egingo da, Nazio Kontseiluaren bidez. Deialdia onartzen bada, hitzordua Donostiako Kursaalen izango da, 2019ko apirilaren 5ean. Bertan bozkatuko da Batzorde Eragilea berritzeko proposamen osoa: 12 lagunen organoa izanik eta Muñozek kargu guztiak utziko dituenez, beste kide bat sartu behar da bere ordez, eta Nazio Batzordeak Maialen Aranburu proposatu du.
Modu honetan, Donostian Batzorde Eragile osoa bozkatuko da, idazkari nagusi berria barne: Mitxel Lakuntza, Amaia Muñoa (idazkari nagusiaren ondokoa), Amaia Aierbe, Xabi Anza, Maialen Aranburu, Iván Giménez, Laura González de Txabarri, Peio Igeregi, Mikel Noval, Leire Txakartegi, Eustakio Uranga eta Joseba Villarreal.
Mitxel Lakuntza Vicario (Iruñea, 1976) ELA-Nafarroako koordinatzailea da (2004an hartu zuen ardura, Jose Mari Otaegi ordezkatuz), eta Batzorde Eragileko kidea. Elektronika teknikaria da, eta ELAko afiliatua 1999tik, Gamesako langilea zenean. Enpresa horretan delegatua izan zen, eta sindikatuaren egituran 2001an sartu zen, hainbat federazioaren arduradun bezala.
Bestalde, Maialen Aranburu Zinkunegi (Lasarte-Oria, 1985) Batzordea Eragilean sartuko da Ekintza Sozialeko ardura hartzeko. Aranburu Gizarte eta Kultur Antropologian lizentziatua eta Gizarte Langintzan diplomatua da, eta Ikasketa Feministak eta Generokoak masterra dauka. ELAko egituran 2016ean sartu zen, eta kargu ezberdinetan egon da; besteak beste, Donostiako eskualdeko eta Irakaskuntzako arduraduna izan da.
