182 kutsatu berri eta beste 33 hildako izan dira, eta 3.568 pertsona osatu dira eta alta jaso dute
BILBO, 6 (EUROPA PRESS)
Espainiako Gobernuak Covid-19 gaitza antzemateko 43.000tik gora test azkar bidali dizkio igandean Eusko Jaurlaritzari, Mikel Sanchez Osasun Planifikazio, Antolamendu eta Ebaluazio zuzendariak astelehen honetan jakinarazi duenez.
Gainera, Sanchezek koronabirusaren berri emateko eguneroko prentsaurrekoan adierazi duenez, igande arratsaldeko 20:00ak arte bildutako datuen arabera, joera aldaketa baieztatu da, kutsatuen eta hildakoen jaitsierarekin. Halere, bidea oraindik "luzea eta gogorra" dela ohartarazi du.
Zehaztu duenez, igandean 738 proba egin ziren eta %29k bakarrik eman zuten positibo. Guztira, 22.637 proba egin dira. Halaber, esan du egoera hobetzen ari dela, bai ZIUetan, bai ospitaleratzea behar duten pertsonei dagokienez.
Ildo honetan, azaldu du Espainiako Gobernuak 43.000 test azkar baino gehiago bidali zituela igandean, eta gaineratu du proba gehiago egiteko asmoa dutela, bereziki lehen mailako arretan.
DATUAK
Orain arte bildutako datuei dagokienez, Covid-19 gaitzak kutsatutako 182 kasu berri erregistratu dira Euskal Autonomia Erkidegoan (EAE) eta guztira 8.810 daude, horietatik 1.756 ospitalean. Gainera, beste 33 pertsona zendu eta orotara 548 hildako izan dira.
Halaber, beste egun batez, gaitza sendatu eta ospitaleko alta jaso duten pertsonen kopuruak gora egin du. Horrela, igandean 124 pertsonak jaso zuten ospitaleko alta eta, hortaz, guztira 3.568 dira osatu eta alta jaso dutenak.
Lurraldeetako datuei dagokienez, Araban 2.675 kasu daude (aurreko egunean baino 36 gehiago), eta horietatik 277 ospitaletan daude; Bizkaian 4.603 pertsona daude kutsatuta (114 gehiago), 1.134 erietxeratuta, eta Gipuzkoan 1.532 kasu positibo daude (32 gehiago), 345 ospitaletan. Halaber, Araban 201 lagun hil dira orain arte, Bizkaian 266 eta Gipuzkoan 81.
