BILBO, 19 Feb. (EUROPA PRESS) -
Euskal Labela duen Esne Bildotsaren Jaia ospatuko da larunbat honetan Bilboko Plaza Berrian, Bizkaiko Foru Aldundiako Nekazaritza Sailak eta Kalitatea Fundazioak, Bilboko Udalaren, BBKren eta Alde Zaharreko Merkatarien Elkartearen laguntzarekin antolatuta. Festa otsailaren 7an zen ospatzekoa, baina eguraldi txarrak atzeratzea behartu zuen antolatzaileak. Ekimenaren helburua produktua sustatzea, bere ezaugarriak jakinaraztea eta Bizkaiko artzainak babestea da.
Antolatzaileek azaldu dutenez, larunbatean, 9:30etan, Carlos Ibarrondo adituak Bizkaiko ekoizleek ekarritako 32 esne bildots burduntzian erretzen hasiko da aldi berean, eta burduntzian egindako erreketak 1.000 pintxotik gora eskainiko ditu 12:30etatik aurrera. Pintxoak euro baten truke banatuko dira eta jasotako dirua Eugenia Epalza Esklerosi Anizkoitzaren Euskal Fundazioaren Bizkaiko ADEMBI ordezkaritzari emango zaio.
Dastaketa gunearen ondoan, Bizkaiko ekoizleen produktuak salduko dituen nekazaritza-azoka txikia ere izango da, eta bertan, besteak beste, gazta, ogia, txakolin edo sagardoa erosteko aukera izango dute gerturatuko direnek. Bertan egongo dira Lea Artibai sagardoa, Basalbeiti txakolina, Florencio Txurrukaren gazta eta Maite Leanizbarrutiaren ogia, besteak beste.
ESNE BILDOTSAREN EZAUGARRIAK
Benetako Eusko Labela duen esne bildotsa azaroa eta maiatza artean ekoizten den sasoiko produktua da, %100ean naturala, eta "Latxa" eta "Karrantza" arrazetakoa. Bere amaren esnea besterik ez du hartzen bildotsak eta hiru edota bost aste duenean sakrifikatzen da. Horrela lortzen da haragi mamitsua, uxterra eta zaporetsua.
Produktua bere fase guztietan dago kontrolpean: ekoizpenetik, baimendutako artzainen erregistroarekin, bildots bakoitzaren identifikazioarekin eta beren elikaduraren eta geografiko eta genetikoaren jatorraren kontrolarekin, hiltegiraino. Bertan, tekniko espezializatuek hilketa eta lana ikuskatzen dute eta aukeraketa zorrotza egiten da, produktuaren arautegian agertzen diren kalitate ezaugarriak betetzen diren bildotsei bakarrik ezarriz Eusko Labela.
Eusko Labela duen esne bildotsak lau kontrol etiketa darama, bakoitza laurden batean, Eusko Label logotipoarekin, hilketaren datarekin eta hiltegiaren izenarekin.
DATUAK
Eusko Label marka lortu zuen lehenengo produktua izan zen esne bildotsa, eta bere ibilbidea azpimarratzekoa izan da ordutik: 1994. urtean Euskal Autonomia Erkidegoan erregistratuta zeuden 81 artzainek 32.000 kilo bildots komertzializatu zuten marka honekin, eta 2008. urtean 392 erregistratuek 200.000 kilo produktu identifikatuta baino gehiago jarri zuten merkatuan. Haien artean, Bizkaiko 51 artzainak, lurralde honetan 12.108 bildots sakrifikatu ziren marka honekin.
Produktu honen ezaugarriak ezagutarazteko eta sustatzeko, Kalitatea Fundazioak promozio kanpaina bat jarri du martxan, ekoizleei, saltzaileei eta kontsumitzaileei zuzenduta. Bilbon eta, aldi berean, Gasteizen eta Donostian ospatuko den jaia kanpaina honen barruan sartzen da.
Esne bildotsaren ekoizleen esanetan, azken urteotan atzerriko produktua (Frantzia, Eskozia, Gales, Grezia, Zeelanda Berria, Italia, Txile) sartzen ibili izan da, eta aurten, krisi ekonomikoa dela-eta, "egoera okertu egin da". "Atzerriko bildotsaren sarrera Euskadin handiagoa dabil izaten aurten eta produkturen kontsumoa jaisten ari da azkenaldian. Beraz, artzainak egoera larria pairatzen ari dira beren bildotsak merkatuan saltzeko orduan", azaldu dute.
Egoera honen aurrean, Eusko Label kalitatezko markarekin identifikatuta dagoen esne bildotsa kontsumitzeko deialdia egin dute. Modu honetan, erositako bildotsa Euskal Autonomia Erkidegokoa dela eta bertako arrazakoa dela ziurtatuko da, hasieratik iruzurrak galaraziz.
