BILBO, 18 (EUROPA PRESS)
Eusko Jaurlaritzako Osasun Sailak eta Osakidetzak Gernikako ospitaleko hirugarren solairua laga diote Bizkaiko Foru Aldundiari, arreta soziosanitarioko unitate gisa erabil dadin. Bi erakundeen artean sinatutako lagapen akordioari esker, ospitalea eraiki zenean etorkizuneko erabileretarako gorde zen espazioa osorik erabiliko da konplexutasun txikiko eta intentsitate handiko osasun zainketa behar duten pertsonen laguntza soziosanitariorako.
Zehazki, bi erakundeotako ordezkariek azaldu dutenez, egoera sozio-familiarragatik etxean edo mendekotasuna duten adineko pertsonentzako egoitzan zainketa behar bezala aplikatu eta gainbegiratzen dela bermatzeko zailtasunak dituzten pertsonen laguntza soziosanitariorako erabiliko da espazioa.
Hartara, Gernikako ospitaleko hirugarren solairuak alta jaso duten baina susperraldia behar duten pazienteak hartuko ditu, gehienbat adineko pertsonak. Unitate hori Bizkaiko ospitalean kokatzeak gizarte eta osasun baliabideen aprobetxamendu eta sinergia handiagoa ahalbidetuko du, pazienteen eta, batik bat, egoera zaurgarrien dauden kolektiboen arretaren eta ongizatearen onurarako.
