BILBO, 18 (EUROPA PRESS)
Haurreskolak Partzuergoko zuzendaritzak eta ordezkaritza sindikalaren gehiengoak akordioa sinatu dute hezitzaileen lan baldintzetan eta haur eskolen funtzionamenduan zenbait alderdi hobetzeko. Zehazki, Haurreskolak Partzuergoaren lan hitzarmenean jasotako 12. eta 52. artikuluen aldaketa dakar akordioak.
Eusko Jaurlaritzako Hezkuntza Sailetik jakinarazi dutenez, Haurreskolak Partzuergoko ordezkaritza sindikalaren %82,98ren babesa du akordioak, LAB (ordezkaritzaren %53,19) eta Steilas (%29,79) sindikatuek izenpetu baitute.
Bada, lan hitzarmeneko 12. artikulua aldatuta, matrikulazioan gerta daitezkeen gorabeheren aurrean, Haurreskolak Partzuergoko zuzendaritzak urtean gehienez 11 hilabetez aldi baterako langileak kontratatu ahal izatea erabaki da. Era berean, premia hori ondoz ondoko bi ikasturtetan luzatzen bada, plaza hori egiturazkoa izango da eta hurrengo ikasturterako eskaintzari gehituko zaio.
Hitzarmenenko 52. artikuluari dagokionez -jasota dator dagoeneko 60 urtetik gorako hezitzaileek haurrei zuzeneko arretan emateko denbora egunean bi orduz murrizteko aukera-, testua hobetzea adostu da, 63 urtetik aurrera baldintza berriak jasotzeko. Hala, idazketa berriak jasotzen duenez, 63 urtetik gorako profesionalak lanaldiaren herena murriztea eskatu ahal izango du, errelebo kontratu baterako baldintzak betetzen ez baditu. Murrizketa hori ikasturtearen amaieran metatu eta gozatu ahal izango du.
Hezkuntza Sailak eta Haurreskolak Partzuergoko zuzendaritzak "positibotzat" jo dute lortutako akordioa, bai eta ordezkaritza sindikalarekin egindako elkarrizketa eta negoziazio prozesua ere.
