BILBO, 9 (EUROPA PRESS)
Ikerbasque Zientziaren Euskal Fundazioko ikertzaileek 2023an lortutako funtsen guztizko zenbatekoa 45.437.886 eurokoa izan da, hau da, 2022an baino 5 miloi euro gehiago. Gainera, 2007tik 380 milioi euro erakarri dituzte Euskal Autonomia Erkidegora (EAE).
Eusko Jaurlaritzako Hezkuntza Saileko eta Ikerbasqueko ordezkariek ostegun honetan Bilbon egindako agerraldian jakinarazi dutenez, 2023. urtea amaitzean, Ikerbasquek ibilbide luzeko eta lidergo gaitasun handiko 191 ikertzaile, goi mailako ikertzaile gazteen harrobia bultzatzen lagunduko duten 106 ikertzaile gazte, eta aurreko bi kategoriak osatuz ikertzaile karreraren etapa guztiak estaltzea xede duen Research Associate kategoriari atxikitako 76 ikertzaile zituen.
Guztion ikerketa lanek "oihartzun zabala" lortu dute aldizkari zientifikoetan, eta haien ikerketa jarduna "nabarmen" islatu da argitalpen zientifikoetan. Hartara, urte osoan, 1.530 artikulu plazaratu dituzte indexatutako argitalpenetan, hau da, nazioarteko kualifikazio handiko argitalpenetan, aurreko urtean baino %6 gehiago.
Ikerbasqueko ikertzaileek 45.437.886 euro erakarri dituzte 2023an EAEra, aurreko urteann baino 5 miloi euro gehiago; 2007az geroztik 380 milioi euro erakartzea lortu dute. Kanpoko finantzaketaz landutako 1.222 proiektutatik (aurreko urtean baino 164 proiektu gehiago), 23k ERC Europako Ikerketa Kontseiluaren finantzaketa izan dute.
ERC da Europako erakunderik ospetsuena ezagutzaren mugan finkatutako asmo handiko ikerketa-proiektuen sustapenari dagokionez, eta 2023ko amaieran 1.639 pertsonak lan egiten zuten Ikerbasqueko ikertzaileek zuzendutako taldeetan. Era berean, ikertzaileek 37 spin-off sortzen lagundu dute.
NAZIOARTEKO IKERTZAILEAK
Bestalde, Ikerbasquek EAEko unibertsitate eta I+G zentroetan lan egiteko erakarri dituen mundu osoko ikerzaileak 35 herrialdetakoak dira, eta gizonak dira nagusi (%71), emakumezkoen aldean (%29). Ikertzaileen jakintza arloei erreparatuta, %46 zientzia esperimentaletako espezialistak dira, %25 medikuntza zientzietakoak, %15 ingeniaritzakoak eta %14 giza eta gizarte zientzietako adituak.
Ikerbasqueko ikertzaile horiek munduko zentrorik ospetsuenetatik etorritakoak dira, MIT, Harvard, Oxford eta Stanfordeko unibertsitateak, CNRS edo Max Planck Elkartea tarteko direla.
Agerraldian nabarmendu dutenez, 2023an lortutako emaitzen harira, EAE "zientziaren arloko Europako erreferentetzat" posizionatu da. "Nazioartean EAE ikerketa aurreratuko eskualdea dela aitortzen dute dagoeneko, nazioarte mailako euskal ikerketa taldeei eta bertan nazioarteko kategoriako ikerketa garatzeko eskaintzen diren baldintza egokiei erreparatuta", adierazi dute.
Horreen adibide da Europako Batzordeak Ikerbasqueren ikertzaileak erakartzeko programa hautatu duela 2023an garapen zientifikoa bultzatzeko Europako ekimenik onenetakotzat. Orain arte, Ikerbasqueko programek 28 milioi euro lortu dituzte Europako Batasunetik.
