BILBO, 29 (EUROPA PRESS)
Eusko Jaurlaritzako Turismo, Merkataritza eta Kontsumoko sailburu Javier Hurtadok gaueko aisialdiko ostalaritzaren sektoreari bideratutako laguntza programa berriaren lerro orokorrak aurkeztu dizkie sektoreko elkarteei. 12 milioi inguru bideratuko dira sektorean pandemiak izan dituen ondorioak arintzeko.
Bileran izan dira Bizkaiko Ostalaritza Elkarteko ordezkari Héctor Sánchez, Gipuzkoako Ostalaritzako Enpresaburuen Elkarteko ordezkari Kino Martínez eta SEA Arabako Enpresarien ordezkari Aitor Otaola eta Luis Cebrián.
Sailburuak azaldu duenez, sektoreko ordezkariekin izaten diren ohiko topaketetako bat izan da. Oraingoan, gaueko aisialdiko sektoreari zuzendutako laguntzen agindu berria izan da gai nagusia, Turismo, Merkataritza eta Kontsumoko Saila orain amaitzen ari dena, alegia.
Gaueko aisialdia murrizketa gehiago izaten ari denez, Jaurlaritzak "beharrezkotzat" jo du laguntzen deialdi berria, soilik 3. eta 4. mailetan sailkatutako establezimenduei zuzendua.
"Turismo, Merkataritza eta Kontsumo Sailetik lanean jarraitu du erresistentzia plana egokitzen inguruabar berrietara, enpleguari eta jarduerari eusten laguntzeko. Erresistentzia Plan bat dugu, 120 milioi euro artekoa; kopuru horren barruan 15 milioi euro daude covid laguntzetan turismorako eta ostalaritzarako, 18 milioi turismoari eusteko, eta 30 milioi Euskadiko ostalaritzari laguntzeko, besteren artean. Eta laguntza horiei gehitu behar zaie orain gaueko aisiako establezimenduetarako laguntzen programa, 12 milioi euro ingurukoa", azaldu du.
Norbere konturako langileentzat, autonomoentzat, lokalen ustiatzaile diren enpresa mikro, txiki eta ertainentzat dira laguntzak, covid-19aren hedapenari aurre egiteko ezarritako neurrien eragina gutxitzeko eta, ahalik eta azkarren, jarduera berriro abiatzeko.
Itzuli beharrik gabeko dirulaguntzak dira, langile kopuruaren arabera. Laguntza honen eta beste batzuen helburua enpleguari eustea da eta, horregatik, aurreko programetan bezala, eskaera aurkezten den unetik jardueran gutxienez lau hilabete altan egotea izango da eskakizunetako bat.
Orain ari dira bukatzen agindu berriaren xehetasunak, Ekonomia eta Ogasun Sailarekin batera, "programa eraginkor bat bizkor aurkeztu ahal izateko". "Abuztuan zehar lanean jarraituko dugu agindua amaitzeko. Irailaren hasieran aurkeztu ahal izatea espero dugu, eta gaueko aisialdiko ostalaritzaren sektorean lan egiten duten pertsona guztiei lagundu ahal izatea", adierazi du Hurtadok.
