GASTEIZ, 7 (EUROPA PRESS)
Eusko Jaurlaritzako gobernu kontseiluak arte eszenikoen ekoizpenerako diru laguntzak arautzen dituen deialdia onetsi du astearte honetan. Zehazki, 2024ko ekitaldian egiten edo hasten diren antzerki, dantza eta zirkuko ekoizpenerako diru laguntzak dira, eta Kultura eta Hizkuntza Politika Sailak 1.560.000 euro banatuko ditu, iaz baino 160.000 euro gehiago.
Jaurlaritzatik jakinarazi dutenez, alde batetik, 300.000 euro bideratuko dira 2024ko uztailaren 1aren ondoren eta 2025eko azaroaren 30a baino lehen estreinatzen diren produkzio proiektuak laguntzera (75.000 euro antzerkirako, 105.000 euro dantzarako eta 40.000 euro zirkurako). Kalean programatuko diren ekoizpen proiektuak 2024ko maiatzaren 16tik aurrera estreinatu ahal izango dira.
Sarearen antzokiekin hitzartutako bira bat aurkezten badute ere eskuratu ahal izango dute diru laguntza, beti ere Sarearen antzokiren batean ekoizpena estreinatu eta hurrengo lau hilabeteetan egiten bada.
Beste alde batetik, izaera profesionaleko lehen proiektuak, izaera berritzaile esanguratsua duten proiektuak eta berariaz ikerketara eta esperimentaziora bideratutako obrak ere lagunduko dira diruz, baldin eta 2024ko martxoaren 30etik aurrera eta 2025eko ekainaren 30a baino lehen estreinatzen badira. Orotara 220.000 euro banatuko dira: 75.000 euro antzerkirako, 105.000 euro dantzarako eta 40.000 euro zirkurako.
Halaber, 2024ko martxoaren 30aren ondoren eta 2025ko ekainaren 30a baino lehen estreinatzen diren produkzioak laguntzera 340.000 euro bideratuko dira (160.000 euro antzerkira, 120.000 euro dantzara eta 60.000 euro zirku ekoizpenetara).
Azkenik, 700.000 euro izango dira 2024-2025 aldian garatuko diren proiektu eszenikoentzako, beti ere Euskal Autonomia Erkidegoko (EAE) merkatua zein kanpoko merkatua kontuan hartzen dituen birako plan bat badute. Modalitate honetan 467.000 euro banatuko dira antzerkirako eta 233.000 euro dantzarako.
