BILBO, 20 (EUROPA PRESS)
Oreka TX musika taldea eta Kukai dantza taldea 'Basque Cultural Fstival' izeneko jaialdian arituko dira ostiralean eta larunbatean, urriaren 22an eta 23an, Ingalaterrako Bruton hirian. Hauser & Wirth arte galeriak Eduardo Chillidari eskainitako erakusketaren testuinguruan dago ekimena, Etxepare Euskal Institutuak jakinarazi duenez.
Etxepare Institutuak babestu du ekitaldia, eta adin guztietako pertsonak gonbidatu nahi ditu "euskal esperientzia batean murgildu eta euskal kulturaren ondare aberatsa ezagutzera". "Musika eta dantza tradizionalen bidez, Chillidaren obran funtsezkoak izan diren gaiekin lotura berriak sortzera animatuko dira bisitariak", adierazi du.
Hain zuzen, euskal tradizioa eta eragin garaikideak uztartzeagatik ezagunak diren Oreka TX musika taldeak eta Kukai dantza taldeak "elkarrizketa artistiko aberatsak" eratu dituzte eskultorearen lanarekin.
Esperientzia osatzeko, Chillida Lekuko Lurra Cafe jatetxeko sukaldari buruak eta Hauser & Wirth Somerset galeriari lotutako Roth Bar & Grill jatetxea elkarlanean arituko dira "euskal inspirazioko menuak" sortzeko. Euskal Herriko produktu eta zaporeak dastatu ahal izango dira, pintxo hotz eta beroak, parrillako sukaldaritza, eta baita euskal ardo sorta zabala ere.
Bruton hirian kokatuta dagoen Hauser & Wirth Somerset arte galeriak Eduardo Chillidari eskainitako erakusketa antolatu du, Hernaniko Chillida Lekuren laguntzarekin, eta 2022ko urtarrilera arte egongo da ikusgai. Igeltsuz, egurrez, altzairuz, burdinez, granitoz, buztin txamotaz eta paperez egindako lanek osatzen dute, guztiak 1949tik 2000ra bitartekoak.
