DONOSTIA, 18 (EUROPA PRESS)
Osakidetzak lehiaketara atera du Donostialdeko ESIaren kanpo kontsultetarako eraikin berriaren euste eta hondeatze lanen lizitazioa, 20 milioi euroko zuzkidurarekin. Donostia ospitalea berrantolatzeko asmo handiko proiektuaren beste urrats bat da, Osakidetzako iturriek jakinarazi dutenez.
Gaur egun, behin-behineko aparkalekuaren obrak abian dira. Aparkaleku horrek aukera emango du egungo aparkalekuko lursailak libre uzteko eta, hala, protonterapia eta kanpo kontsultetarako eraikinak eraikitzeko. Aurreikusi da Protonterapia Unitatearen obrak udan hastea eta kanpo kontsultetarako eraikin berriaren eraikuntza urtea amaitu aurretik.
Osakidetzak 78 milioi euro konprometitu ditu kanpo kontsulten eraikinean. Eraikina Donostia Unibertsitate Ospitalean kokatuko da eta 48.000 metro koadroko azalera eraikia izango du. Eraikuntzak bost solairu izango ditu sestra gainean, eta batez ere kontsulta eremurako (250 eremu berri baino gehiago pazienteen diagnostikorako eta tratamendurako) eta eguneko ospitale berrirako izango dira.
Gainera, lau solairu izango ditu sestra azpian. Horietako hiru aparkalekurako izango dira (560 plaza), eta lehenengo soto solairua banatuko da erradiologia eremu baten eta ospitale osorako espazio logistiko handi baten artean.
Eraikina sotoetako barne galeria batekin konektatuko da Protonterapia Unitatearekin, baita Donostia ospitaleko gainerako eraikinekin ere. Bestalde, aireko konexio galeria baten bidez, posible izango da Donostia ospitaleko eraikinen arteko langileen konexioa.
ERAIKIN BERRI ETA MODERNOA
Modu honetan, Donostialdeko ESIko Donostia Unibertsitate Ospitaleak eraikin berri eta modernoa izango du. Eraikinaren helburua da osasun sistemaren asistentzia kalitateari eta modernizazioari heltzea, ekipamendua, teknologia eta instalazioak egokitzearen eta berritzearen bidetik.
Azken helburua da pazienteari ematen zaion arreta integrala hobetzea, eta, horretarako, gertakari kliniko anbulatorioei diziplina anitzen bidez ekitea eta bereizmen handiko proba osagarriak eranstea.
Kanpo kontsultetan, asistentzia profil berriak eta erizaintzako profesionalentzako zeregin berriak gehituko dira, Eguneko Ospitalerako eremu bat izango da, eta probak egiteko eremuak, prozeduretarako eremuak eta diziplina anitzeko lan eta asistentzia eremuak antolatuko dira.
Kanpo kontsultetarako eraikin berriari esker, egungo espaziorik eza konponduko da. Gainera, sistemarako irisgarritasuna hobetuko da, eta, horrela, asistentzia anbulatorio espezializatuko kontsulta kopurua handituko da eta espezialitate batzuetako itxaron zerrendak murriztu. Hartara, kanpo kontsultak ospitalizazioarekin eta Donostialdeko ESIko osasun konplexuko gainerako eraikinekin lotuko dira.
