BILBO, 25 (EUROPA PRESS)
Eusko Jaurlaritzaren Euskal Turismoari Eusteko Planean bildutako laguntzen eskaera egiteko epea amaitu da eta 1.686 enpresak erregistratu dute eskaera. Zuzeneko Laguntzei buruzko Agindua denez, baldintzak betetzen dituzten enpresa guztiek jasoko dute dagokien laguntza.
Turismoa, Merkataritza eta Kontsumoa Saileko iturriek gogorarazi dutenez, 21 milioi euroz hornitutako agindua honela banatuko da: ia 18 milioi euro zuzeneko laguntzetarako, eta hiru milioi euro sustapenerako eta dinamizaziorako eta ikuskapen lana birbideratzeko.
Beste erakundeek hartutako neurri ekonomiko batzuk osatzen ditu Jaurlaritzaren ekimenak, eta guztiekin bateragarria da. Euskal turismo sektoreko norberaren konturako langileentzako, autonomoentzako, mikroenpresentzako eta enpresa txiki eta ertainentzako bideratu da laguntza hori.
Lurraldeen arabera, Gipuzkoan 753 eskaera egin dira, Bizkaian 695 eta Araban 238. Diruz lagunduko diren jarduera motei dagokienez, turismo ostatuko 1.057 establezimenduk jasoko dituzte laguntzak; horietatik 434 hotelak dira, 143 nekazaritza turismoko establezimenduak, 156 landetxeak, 17 kanpinak eta, gainerakoak, turismo arloko beste mota bateko ostatuak (ostatuak, apartamentuak, ikastetxe nagusiak eta abar).
Bestalde, bitartekaritzako 209 enpresa turistiko (bidaia agentziak), turismo aktiboko 162 enpresa, 125 turismo gidari, biltzarrak antolatzen dituzten 71 enpresa eta garraio turistikoko 62 enpresa ere erregistratu dira.
Enpresa horiek, bakoitzaren neurriaren arabera, kopuru bat edo beste bat jasoko dute. Langile bat eta hiru artean dituzten enpresei emango dizkieten 6.000 eurotik, 49 langile edo gehiago dituzten enpresei emango dizkieten 15.000 euro arte.
Bitartekaritzako enpresa turistikotzat edo bidaia agentziatzat jotzen diren erakundeentzako diru kopuruak handitu egiten dira. Langile bat eta hiru artean dituzten enpresei emango dizkieten 10.000 eurotik, 49 langile edo gehiago dituzten enpresei emango dizkieten 20.000 euro arte. Kopurua handitzeko arrazoia da airelineek edo bidaia antolatzaileek oraindik itzuli ez dizkieten diru kopuruak eurek bezeroei itzuli behar izan dizkietelako bereziki kaltetuak izan diren enpresak daudela horien artean.
Bestalde, Turismoa, Merkataritza eta Kontsumo Saila jada prestatzen ari da merkataritzako sektore kaltetuenei laguntzeko plan bat eta euskal ostalaritzari zuzendutako laguntzen programa bat.
