GASTEIZ, 26 (EUROPA PRESS)
Umetoki lepoko minbiziaren baheketarako programa Araban zabaltzen hasi da Osakidetza, eta 440 gutun bidali dizkie 25 eta 29 urte bitarteko emakumeei, beren osasun zentroko emaginarenera joateko hitzordua emanez. Zehazki, abenduaren 3tik aurrera, Lakuabizkarra, Salburua, Zabalgana eta Lezako zentroetan eta azaroaren 30etik Agurainen probak egiten hasiko dira. Proben bidez, umetoki lepoko minbizia garatu aurretik minbizi aurreko lesioak antzeman daitezke. Minbizi mota hori emakumeetan eragin gehien duen hirugarrena da.
Jon Darpón Jaurlaritzako Osasun sailburuak proba hori egingo duen Araba ESIko zentroetako bat bisitatu du astelehen honetan, Lakuabizkarran. Araban programa ezartzean "oso urrats garrantzitsua" eman dela nabarmendu du, "minbizitik bizirik irteteko tasak handitzen laguntzen ari garelako". Osakidetzak eta Osasun Sailak "prebentzioaren eta diagnostiko goiztiarraren alde apustu egiten jarraitzeko" duten konpromisoa berretsi du, bai eta programa horietara "berdintasun baldintzetan" jotzekoa ere, "egon daitezkeen desberdintasunak saihesteko".
Lakuabizkarrako zentrora egindako bisitan, Juan Luis Diego Osakidetzako zuzendari nagusia, Fátima Ansotegi Osasun sailburuordea, Nekane Murga Osasun Plangintza, Antolamendu eta Ebaluazioko zuzendaria, Andoni Arcelay Osakidetzako Osasun Laguntzako zuzendaria eta Antonio Arraiza Osakidetzako osasun eremuko programen koordinatzaile korporatiboa ere izan dira.
Astelehen honetatik Araba ESIan, Arabako Errioxako ESIan eta Debagoieneko ESIan ere zabalduko den programa ekainean abiatu zen Debabarrenako ESIan, esperientzia pilotu gisa. Prebentzio jarduerak 25 eta 29 urte bitarteko emakume guztiak hartzen ditu, sistematikoki, eta, horretarako, banako gonbidapena egiten zaio emakume bakoitzari, proba egin ahal izateko.
Programa pixkanaka ari da ezartzen lehen urtean, 25 eta 29 urte bitarteko emakumeetan, eta adin tartea zabaltzen joango da, pixkanaka, 2023ra arte. Horrela, 65 urte arteko emakumeetara ere iritsi nahi da. Gainera, datorren urtetik aurrera, Gipuzkoan oraindik zabaldu ez den ESIetara zabalduko da -Donostialdea, Goierri-Urola Garaia, Bidasoa, Tolosaldea-, bai eta Bizkaikoetara ere.
