A CORUÑA, 21 Feb. (EUROPA PRESS) -

O director xeral de Caixa Galicia, José Luis Méndez, e o reitor da Universidade da Coruña (UDC), José María Barja, asinaron hoxe o convenio de colaboración polo cal o centro académico, xunto coa Fundación Empresa-Universidade Galega (Feuga), desenvolverá o 'Proxecto Metrópolis', que representa a nova arquitectura informática da caixa de aforros.

Este acordo, que permitirá dedicar case 2.500 horas de traballo e conta cunha inversión de 96.000 euros, pretende favorecer a innovación en tecnoloxías de desenvolvemento software de Caixa Galicia proporcionándolle formación, apoio e desenvolvendo prototipos aplicables aos proxectos da entidade bancaria.

"Para poder competir e combater a cantidade de retos da economía, é obrigado que o sistema da empresa sexa máis fluído", dixo Méndez, quen engadiu que, "por moito que se inverta" en proxectos de I+D+i, "se non hai unha colaboración dificilmente se poderán afrontar as complicacións do cambio económico e social de enorme envergadura ao que estamos a asistir".

Pola súa banda, o reitor da UDC asegurou que esta colaboración demostra que a universidade "é capaz de responder" economicamente neste tipo de proxectos e expresou a súa gratitude por "colaborar na renovación tecnolóxica dunha entidade tan importante como Caixa Galicia".

ÁMBITOS.

O primeiro dos ámbitos que abarca 'Metrópolis' é o estratéxico, onde os obxectivos serán os de reducir o 'time to market', aumentar as posibilidades dos servizos existentes, reducir a dependencia dos provedores e aumentar o aliñamento entre negocio e tecnoloxía. No económico, os obxectivos serán os de reducir o custo total da propiedade e dos custos do software en xeral.

Por último, no ámbito tecnolóxico, Caixa Galicia persegue a actualización da plataforma tecnolóxica, aumentando a produtividade, a flexibilidade, a simplificación e interoperabilidade entre os sistemas, a homogenización no desenvolvemento de software e a reutilización dos sistemas existente dende o punto de vista de negocio.