VIGO, 1 Sep. (EUROPA PRESS) -

A Universidade de Vigo presenta dende hoxe en Dinamarca as súas investigacións en materia de tecnoloxías limpas, dentro da Feira Internacional Copenmind 2008 que reúne na capital do país a institucións académicas, empresas e axentes implicados en transferencia de coñecemento e tecnoloxía.

Así, a institución académica de Vigo, que coas politécnicas de Madrid e Valencia son as únicas españolas que concorren á cita danesa, acode cun stand propio no que difundirá a información relativa á oferta científica e tecnolóxica dos grupos científicos que traballan nas tecnoloxías verdes, así como os resultados dos seus traballos. Ademais, tamén se disporá de material gráfico sobre patentes, co obxectivo de atopar oportunidades de comercialización.

O obxectivo de Copenmind, que dende hoxe e ata o mércores celebra a súa primeira edición, é propiciar o intercambio de coñecemento entre universidades e empresas de todo o mundo. Na cita deste ano, o tema das tecnoloxías limpas abordará os campos como o cambio climático, a contaminación atmosférica, a enerxía, a auga, os residuos e o reciclado e a agricultura e o chan.

A organización da feira de Copenhague destaca a importancia de crear sinerxías en relación co próximo cumio mundial que se celebrará na capital danesa en 2009, ante a posibilidade de abrir camiños cara a unha unión económica e intelectual con carácter global que permita definir novos estándares de colaboración entre ambos os dous campos.

As dúas próximas edicións de Copenmind, que é un evento de periodicidade anual, dedicaranse á enerxía e á saúde, respectivamente.