Recoñeceranse creacións de carácter xeral, público, de promoción de patrimonio, cultura e galego e aplicacións informáticas

SANTIAGO DE COMPOSTELA, 27 Mar. (EUROPA PRESS) -

A Secretaría Xeral de Modernización e Innovación Tecnolóxica destinará 162.000 euros a premiar o desenvolvemento de novos contidos para Internet, convocatoria destinada a particulares e asociacións non empresariais sen ánimo de lucro e que se inclúe no Plan estratéxico da Sociedade da Información e no Plan avanza.

O obxectivo do departamento autonómico é fomentar a creación de espazos para a Rede que destaquen "pola súa creatividade e calidade" e que sirvan como "elementos tractores" no achegamento ás novas tecnoloxías a todos os colectivos sociais da Comunidade Autónoma.

Os galardóns divídense, así, en catro categorías en función da temática: de carácter xeral, contidos públicos orientados aos colectivos con maiores dificultades de inclusión, promoción do patrimonio, da cultura e da lingua galega e aplicacións informáticas para a prestación de servizos.

En cada unha delas establécense dúas modalidades, a primeira das cales se corresponde cos novos contidos desenvolvidos por persoas físicas, con catro premios de 8.000 euros --un por categoría-- , catro segundos premios de 5.000 euros --tamén un por categoría-- e oito terceiros de 3.000 --dous por categoría--.

Pola súa banda, o segundo tipo responde ás creacións de entidades de dereito público e privado sen ánimo de lucro, na que haberá catro primeiros premios de 10.000 euros --un por categoría--, catro segundos de 5.500 --outro por categoría-- e oito terceiros de 3.000 --dous por categoría--.

REQUISITOS E CRITERIOS

Os traballos deberán reunir requisitos como presentarse en lingua galega e acompañarse dunha memoria, ser orixinais, non comercializada e non premiada nin sufragada pola Administración autonómica.

En canto aos criterios de avaliación, o xurado valorará a posibilidade de emprego nas plataformas tecnolóxicas máis estendidas no mercado tanto de escritorio como móbil. Tamén se terán en conta aspectos funcionais, técnico estéticos e psicolóxicos, así como o grao de innovación da idea. A georreferenciación das imaxes e o uso de licenzas libres e estándares abertos puntuará.

Os interesados en participar poden ter máis información e acceder a toda a documentación na web da secretaría, no apartado axudas e presencialmente na Subdirección Xeral de Desarrollo de la Sociedad de la Información.