Adicae pide que no xuízo a exdirectivos de NCG se "afonde" sobre a súa xestión na venda de "produtos tóxicos"

SANTIAGO DE COMPOSTELA 9 Jul. (EUROPA PRESS) -

A coordinadora de Adicae en Galicia, Iria Aguete, pide que o xuízo oral que se abriu por parte da Audiencia Nacional contra cinco exdirectivos de Novacaixagalicia, entidade resultante da fusición de Caixa Galicia e Caixanova, "se investigue e afonde" sobre a xestión destas persoas na "comercialización de produtos tóxicos".

"Queremos que se afonde na xestión destas persoas e na comercialización de produtos tóxicos", manifestou, en declaracións a Europa Press, a coordinadora de Adicae --Asociación de Usuarios de Bancos Caixas e Seguros-- na Comunidade galega.

Ademais, Iria Aguete avanzou que este xoves esta entidade levará a cabo unha acción na Coruña como "contra campaña" á que está a levar a cabo ABANCA, a nova marca da entidade tras a venda do banco resultante da fusión das caixas galegas ao Grupo Banesco.

Esta acción consistirá na pegada de carteis para recordar que aínda "quedan afectados de preferentes e subordinadas" e que, "calquera cousa que se diga distinta, é mentira". O punto de encontro será a sede central da entidade na Coruña, na Rúa Nova, ao mediodía.

O xuíz da Audiencia Nacional Ismael Moreno decidiu a apertura de xuízo oral a cinco exdirectivos de Novacaixagalicia, entidade resultante da fusión das extintas caixas de aforro galegas, Caixa Galicia e Caixanova, por cambios nos seus contratos de alta dirección para o cobramento de indemnizacións millonarias. O avogado Ricardo Pradas, que exerceu de asesor no comité de retribucións, tamén será xulgado.

O auto, con data do pasado 4 de xullo dá 20 días de prazo para presentar escrito de defensa á representación do excopresidente de Novacaixagalicia Julio Fernández Gayoso, que fose director xeral de Novacaixagalicia, José Luis Pego; o exdirector xeral adxunto executivo, Javier García de Paredes; o exresponsable do Grupo Inmobiliario, Gregorio Gorriarán, e a un dos xestores da oficina de integración, Óscar Rodríguez Estrada, así como ao letrado Ricardo Pradas.

Ese mesmo prazo lles dá para que, de forma solidaria, os acusados presenten unha fianza equivalente ao diñeiro que se lles reclama, 18,9 millóns, "para asegurar as responsabilidades pecuniarias que lles puidesen impoñer"

"QUEREMOS QUE SE INVESTIGUE A COMERCIALIZACIÓN"

Adicae, comparecida nas actuacións como acusación popular, nun escrito con data do pasado 17 de xuño, solicitou a apertura de xuízo oral ante a Sala do Penal da Audiencia.

Esta asociación reclama penas maiores para os acusados que o resto de comparecidos, de catro anos de prisión, así como multas máis elevadas (con cota diaria de 300 euros).

"Queremos que se investigue a comercialización de produtos tóxicos, que se afonde durante o xuízo, porque vai todo unido a esa mala xestión,", abundou Iria Aguete, quen sinalou que "a xestión non foi brillante, nin moito menos, nin para as caixas nin para os consumidores".