Pide agardar a coñecer a lei estatal de transparencia anunciada por Rajoy "independentemente da redución de deputados" en Galicia
NOGUEIRA DE RAMUÍN (OURENSE), 1 Sep. (EUROPA PRESS) -
O vicepresidente da Xunta de Galicia e secretario xeral do PPdeG, Alfonso Rueda, espera chegar a acordos cos partidos e apelou para iso a forzas políticas "que pregoan vontade de consenso e logo cortan radicalmente" as posibilidades de acordo, en relación á "oferta ampla" do presidente do Goberno central, Mariano Rajoy, de medidas para unha lei estatal de transparencia.
Rueda visitou este luns o ámbito do mosteiro de San Estevo de Ribas de Sil para coñecer un dos lugares de paso dunha ruta turística en bicicleta que contará con tres centros de recepción de visitantes antes de finais de ano, e alí respondeu a preguntas dos xornalistas, acompañado polo presidente da Deputación de Ourense e do PP provincial, Manuel Baltar; o alcalde de Nogueira de Ramuín, José César Parente; o delegado territorial da Xunta, Rogelio Martínez, e un técnico.
O dirixente do PPdeG manifestou que dende Galicia se acompañará o proceso cara á lei estatal, anunciada polo presidente do Goberno no acto de inicio do curso político celebrado este domingo en Soutomaior (Pontevedra).
"Se recordo ben, o presidente estableceu un prazo de dous meses para ofrecer consenso a todas as forzas política para afondar nunha lei estatal de transparencia que vai cambiar moitas cousas", sostivo o vicepresidente galego. Agora, segundo dixo, é o momento de "ir coñecendo as medidas avanzadas" e "se verá ata qué punto" as forzas políticas están dispostas a chegar a un acordo.
REDUCIÓN DE DEPUTADOS
Nese sentido, aludiu á futura norma de ámbito estatal para indicar que é independente do que corresponde ao Parlamento de Galicia. "Aquí anunciamos a lei de redución de deputados e vaise cumprir, pois era un compromiso adquirido no programa electoral e cremos que a pesar dalgunhas voces que se manifestaron rotundamente en contra, sen querer facer nada con iso, a maioría da xente está de acordo cunha institución que custe menos aos cidadáns", comentou.
Sobre a nova medida galega, Rueda manifestou que está en fase de relatorio e ao Parlamento de Galicia lle corresponderá aprobala ou non. Sinalou que a norma autonómica "é máis ampla" que a decisión de reducir o número de deputados do Parlamento e que o PSOE "está de acordo noutros puntos", pero na redución de deputados "dixo categoricamente que non".
"Nós claramente dixemos que cremos que é bo reducilos así que niso non hai acordo", e en relación a outras forzas políticas, segundo Rueda, a posición foi: "Non, baixo ningún concepto e nin sequera quixeron negociar ese punto".
CARGOS PÚBLICOS IMPUTADOS
Así mesmo, Rueda aludiu á oposición das forzas políticas ante a outra reforma anunciada, a electoral, para indicar que agora, ante a proposta de Rajoy da lei estatal de transparencia, "non ten ningún sentido" pronunciarse nin dicir cousas "de algo que non se coñece aínda".
Ao respecto, reprochou que algúns digan: "Non rotundamente, non hai nada que negociar", pois, segundo afirmou Rueda, iso "non leva a ningunha parte". No caso concreto de incluír medidas sobre os cargos públicos imputados, para acordar o momento da súa dimisión, "hai que chegar a acordos, e sobre isto tamén, e todas as forzas políticas deberían facelo e logo cumprir", agregou.
O vicepresidente da Xunta propuxo "ver" o contido da lei anunciada o domingo polo presidente Rajoy e logo "ver en que se poñen de acordo as forzas políticas". A oferta, segundo dixo Rueda, foi ampla e verase" como vai o consenso.
Pola súa banda, o presidente da Deputación e do PP provincial de Ourense, Manuel Baltar, respondeu antes da chegada de Alfonso Rueda a preguntas sobre as propostas do presidente do Goberno e, en relación á posible dimisión de cargos públicos imputados en procesos xudiciais, apuntou que o ministro de Xustiza "aposta claramente" por propoñer ás forzas políticas a dimisión do cargo cando se decrete apertura de xuízo oral.
"INXUSTIZA"
Nese sentido, manifestou que no caso da provincia de Ourense, con varios alcaldes e cargos públicos do PP imputados --rexedores de Xinzo de Limia, O Carballiño, Rairiz de Veiga e o delegado da Xunta de Galicia, entre outros--, aplicarase o acordo se é de obrigado cumprimento. Ademais, apuntou a "inxustiza" que sería implementar o acordo de dimisión ao abrirse o xuízo, en casos como o do alcalde de Baltar, que foi denunciado, investigado, xulgado e absolvido.
"Adiantarse ás leis está ben, pero falamos dunha dimisión que é cuestión dunha decisión persoal, aínda que a sociedade reclama este tipo de comportamentos, pero non hai que esquecer a presunción de inocencia, e de todo isto haberá que falar", concluíu Baltar.
