SANTIAGO DE COMPOSTELA, 16 Dic. (EUROPA PRESS) -
A portavoz nacional do BNG, Ana Pontón, arremeteu contra a xestión sanitaria da Xunta de Galicia, que lidera un Alberto Núñez Feijóo ao que considera que "é un perigo para a saúde dos galegos", con "mentira e ocultación" coa que tenta tapar os "recortes" e a súa "política privatizadora".
"A resposta do PP é que o fan marabillosamente, ou é que nos toman por parvos ou realmente estamos ante un goberno de sádicos", asegurou Pontón, nunha entrevista este domingo en Radio Nacional de España, recollida por Europa Press.
Nun contexto marcado pola dimisión en bloque de máis dunha vintena de xefes de servizo de Atención Primaria da área sanitaria de Vigo e as protestas de distintos colectivos sanitarios e de usuarios, Ana Pontón, acusou a Feijóo de estar "a destruír" e "triturar" a sanidade galega.
A portavoz nacional do BNG demandou ao presidente da Xunta unha "rectificación" das políticas sanitarias actuais e o cesamento do conselleiro de Sanidade, Jesús Vázquez Almuiña, porque é "parte do problema".
Un problema que describe marcado por "listas de espera disparadas, con centos de persoas que non aparecen en listas oficiais" ou con máis de 100.000 persoas que non toman os seus tratamentos "porque non poden pagalo", e con "mobilizacións todas as semanas".
Neste contexto, pon o foco no falecemento dunha persoa no PAC da Estrada que non chegou a recibir asistencia sanitaria. A comparecencia dos seus familiares realizarase este luns, pero será no marco dunha comisión de investigación de sanidade alternativa, impulsada polos grupos da oposición como resposta á 'oficial' celebrada no Parlamento, pero á que En Marea, PSdeG e BNG non acoden en protesta polo "veto" do PP aos comparecentes que propuxeran.
"Teñen medo a que a xente fale", resolveu Ana Pontón, que censurou a negativa do Parlamento de Galicia a que se celebre nas súas instalacións esta "contracomisión".
Ao seu xuízo, trátase dun "veto antidemocrático", de "política cutre", que permitiu que os membros do PP se quiten "a careta de demócratas" e demostren "que son autoritarios". "Crense que o Parlamento é deles", remarcou.
TRANSFERENCIA AP-9
Por outra banda, despois de que o Congreso aprobase a transferencia da AP-9 a Galicia, Ana Pontón reclama que se dea un paso máis e se estude tanto o rescate da Autoestrada do Atlántico como a rebaixa de peaxes.
"O que ten que facer o presidente da Xunta é porse a negociar co Goberno e Audasa para que non se suban as peaxes o próximo ano", ao considerar que a autoestrada xa está máis que "amortizada".
Ana Pontón reprocha ao PP que agora que non goberna cambie o seu discurso con respecto á AP-9, pero esíxelle que ademais dea explicacións pola súa xestión anterior. Acusa así ao PP da situación na que se atopa a Autoestrada, pola ampliación do período de concesión até 2048 que se acordou durante o goberno de José María Aznar.
"O PP ten moito que ver, foi o goberno de Aznar o que privatizou a AP-9, o que a vendeu a prezo de saldo por 1.500 millóns de euros e ampliou a concesión até 2048, e aínda non pediron perdón pola súa traizón ao país", remarcou.
