LUGO, 22 Ago. (EUROPA PRESS) -
O bebé ingresado no Hospital Lucus Augusti de Lugo (HULA) con signos de ter sido maltratado será trasladado nos próximos días ao Hospital da Paz de Madrid para ser operado.
Así o confirmaron fontes hospitalarias, que precisaron que o traslado se fará "esta fin de semana ou a semana que vén", segundo vaia a "evolución" do menor.
A decisión de trasladar ao bebé até Madrid obedece a que A Paz é centro de referencia para intervencións cirúrxicas en neonatos e as lesións do menor obrigan a que sexa operado dun desprendemento de retina.
TRABALLOS DE LIMPEZA
Por outra banda, o Concello de Lugo continúa cos traballos de "limpeza e desinfección" do piso onde vivía o bebé cos seus pais, que permanecen investigados por un suposto delito de malos tratos.
Do interior desta vivenda, segundo lembrou o concelleiro de Medio Ambiente, Álvaro Santos, retiráronse numerosos aveños e residuos, e ao redor de "unha tonelada e media de lixo".
Santos explicou que se "aplicaron os produtos recomendados, elixidos pola entidade responsable de facer a limpeza" e engadiu que se procede tamén a un proceso de desinfección e desratización do edificio, "porque se percibiu a presenza de animais".
"Hai que pensar que non estamos ante unha situación normal. Estamos ante unha situación anómala, dramática e ante un inmoble que se atopaba nunhas circunstancias lamentables de salubridade e habitabilidade", describiu.
Santos incidiu en que o labor do concello "é deixalo impecable e sobre todo saudable e con seguridade para os veciños". "Unha vez terminados os traballos impulsados pola área de Medio Ambiente do concello, aí non vai haber ningún tipo de perigo, de foco infeccioso, nin de presenza de animais xa sexa mamífero, roedor ou insectos que poidan pór en risco a saúde das persoas", comprometeu.
