LUGO, 23 Oct. (EUROPA PRESS) -
O secretario xeral do PSdeG, José Ramón Gómez Besteiro, esixiu á Xunta "información e transparencia" no relacionado coa Operación Zeta, tras coñecerse que dous cargos da Consellería de Traballo que xa dimitiron recibirían 26.000 euros do líder da trama, quen tamén anotou na súa caixa B pagamentos ao PP por 17.000 euros.
Despois de que o alcalde da Coruña, Carlos Negreira, sostivese que "non había ningunha cuestión" na contabilidade oficial do Partido Popular", Besteiro replicou que "a preocupación dos cidadáns en España non está na contabilidade A do Partido Popular, senón que a preocupación vén por que poida existir unha contabilidade B".
Dito isto, o dirixente dos socialistas galegos subliñou que "ante estas cuestións, o que se ten que facer é total información e total claridade". "Cada un sacará o grao de responsabilidade conveniente, pero o que ten que facer unha administración é dar toda a información con total transparencia e sen ningún medo, á marxe de que se estea a facer unha investigación xudicial sobre esa cuestión", afirmou Besteiro.
