Publicado 01/08/2020 12:46:01 +02:00CET

O BNG critica que Feijóo non presentase unha proposta dos fondos europeos de reconstrución que debe recibir Galicia

A portavoz do BNG en Europa, Ana Miranda, nunha foto de arquivo nunha rolda de prensa
BNG

   SANTIAGO DE COMPOSTELA, 1 Ago. (EUROPA PRESS) -

   A portavoz do BNG en Europa, Ana Miranda, criticou que o presidente da Xunta en funcións, Alberto Núñez Feijóo, acudise este venres á Conferencia de Presidentes sen unha proposta concretando a contía dos fondos europeos de reconstrución que reclama para Galicia e considerou que "non exerceu de presidente".

   Nun comunicado, Miranda indicou este sábado que tampouco presentou propostas dos proxectos que poden ser financiables con estes fondos. Ao seu xuízo, o xefe do Executivo galego acudiu ao encontro, celebrado na Rioxa, "sen ter os deberes feitos".

   A repartición dos 140.000 millóns de euros de Europa "é un tema suficientemente importante como para que Feijóo levase algunha proposta" coa que "facer valer os intereses galegos". Outras comunidades, como Cataluña ou Valencia, agregou, xa teñen un cálculo da cifra.

   Miranda considerou que "a máxima achega" de Feijóo foi pedir que se rebaixe o IVE das máscaras, algo que "pode estar ben, pero dista moito de ser o adecuado".

   O presidente galego foi á reunión "a sentar a escoitar e a pedir que lle envíen documentación", proseguiu Miranda, que cualificou de "sarcástico" que o presidente galego resaltase que os fondos europeos deben empregarse ben.

   "En Galicia temos numerosos exemplos de fondos europeos mal utilizados baixo o seu mandato, como as numerosas depuradoras que non funcionan, o deficiente e mesmo inexistente saneamento de rías e ríos ou infraestruturas abandonadas", censurou.

   A representante da formación nacionalista volveu a criticar a "reacción tardía" da UE para paliar as consecuencias da crise causada pola pandemia da COVID-19 e a "falta de solidariedade" cos pobos afectados. Agora, engadiu, "súmase a falta de iniciativa do presidente da Xunta".

   Baixan partidas "fundamentais" para Galicia como a PAC, os fondos de cohesión ou os fondos para a transición xusta, o que debería levar a Feijóo a "anticiparse e traballar para que Galicia non salga prexudicada con eses recortes", instou.

Contador