SANTIAGO DE COMPOSTELA, 26 Nov. (EUROPA PRESS) -
A concelleira do BNG en Santiago Elvira Cienfuegos lamentou que a cidade "volva ser noticia" por investigacións do ámbito xudicial sobre membros da casa do concello e aludiu ao suposto financiamento irregular do PP compostelano para sinalar que é "semellante ao que acontece" a nivel estatal.
En calquera caso, sen entrar en detalles sobre a investigación da xuíza que instrúe a Operación Pokémon en torno a se o PP e o PSOE de Santiago se financiaron de forma irregular, Cienfuegos pediu que "se resolva rapidamente" ao obxecto de que se poidan "tomar decisións se hai culpables" e, de non os haber, poñer fin á situación.
Con todo, neste escenario, defendeu unha vez máis que "o que procede" por "razóns de imaxe institucional e democrática" é que as persoas involucradas nun proceso que "xera tanta alarma social e tanta desafección da cidadanía cara á política" abandonen os seus cargos.
Fundamentalmente porque, como sostivo a edila nacionalista, a "preocupación" do concello está máis centrada que en "atender as necesidades xerais nos "intereses de cada un". Así, "non hai cooperación entre os distintos membros do goberno, senón unha pugna entre eles para resolver mellor as súas situacións persoais", opinou.
"Por iso é moi importante tomar decisións definitivas e deixar a representación municipal", defendeu, convencida de que un debe "deixar libres as institucións" para defenderse" e para que se poida continuar desenvolvendo "o quefacer de cada día" no concello, neste caso.
No que atinxe á súa formación, Cienfuegos puxo "a man no lume" polos seus compañeiros durante a etapa do bipartito local e xulgou "evidente" que o Bloque "se"financia coas achegas públicas e da militancia. "De aí que as súas finanzas non estean boiantes", resolveu.
