SANTIAGO DE COMPOSTELA, 2 Ago. (EUROPA PRESS) -
Membros da Garda Civil e de Protección Civil de Ribeira de Piquín e da Fonsagrada, xunto con veciños da zona, están a buscar a un home que está desaparecido desde o venres e que reside en Ribeira de Piquín (Lugo).
O dispositivo atópase este domingo rastrexando os montes no veciño concello de Baleira, posto que o domicilio do home desaparecido atópase preto do límite con este municipio e as informacións apuntan a que o desparecido se desprazou nesta dirección, indicou un membro de Protección Civil da Fonsagrada.
O home ten ao redor de 40 anos e a última vez que se soubo del foi o venres. O dispositivo, ao que se incorporaron varios veciños, trata de localizalo nunha zona de monte, sinalaron as mesmas fontes.
