Valora a "vontade de diálogo" entre Unidas Podemos e PSOE e vaticina que "haberá un goberno de cambio" en Galicia a partir de 2020
SANTIAGO DE COMPOSTELA, 12 Nov. (EUROPA PRESS) -
O secretario xeral do PSdeG, Gonzalo Caballero, celebrou o preacordo alcanzado entre PSOE e Unidas Podemos para a formación dun goberno de coalición que, para o líder dos socialistas galegos, marca "o principio dunha lexislatura de prosperidade e de futuro" para España e Galicia.
"Estamos plenamente satisfeitos de que se avance nesta liña de acordo porque o PSdeG sempre apoiou que houbese un goberno progresista, socialista e de esquerdas para o conxunto do Estado", sinalou Caballero en declaracións aos medios nos corredores do Parlamento de Galicia, onde este martes se celebra unha sesión plenaria.
O líder dos socialistas galegos restou importancia a que o acordo entre o seu partido e Unidas Podemos chegue despois dunha repetición electoral motivada pola falta de entendemento entre estas mesmas forzas, polo que emprazou a mirar "cara a adiante" antes de valorar un pacto "positivo e que é ben recibido pola maioría da sociedade en España e Galicia".
Neste sentido, despois de lembrar que a "maioría dos galegos" optaron polo bloque progresista o pasado 10 de novembro, subliñou que "a Galicia lle convén" un goberno "de progreso presidido por Pedro Sánchez que faga fronte á dereita rancia que está disposta a pactar coa ultradereita de Vox".
"CINISMO" DO PP E FEIJÓO
A continuación, Gonzalo Caballero afeou o "cinismo inadmisible" que atribúe ao Partido Popular e o seu líder en Galicia, o presidente da Xunta, Alberto Núñez Feijóo; aos que acusou de cambiar o discurso mantido na campaña após coñecerse o acordo de gobernabilidade asinado este martes por Sánchez e o líder de Podemos, Pablo Iglesias.
"O PP dicía de forma continua que ían imposibilitar un goberno de Pedro Sánchez, dicindo que era incluso unha tarefa patriótica impedilo e vetalo. Agora cambian de posición e Feijóo, que é un mago do cinismo e a inconsistencia política, di que (o PSOE) ten que falar co PP", aseverou o secretario xeral do PSdeG.
VALORA A VONTADE DE ENTENDEMENTO
Así as cousas, Caballero enxalzou a vontade de entendemento entre PSOE e Podemos para pór en marcha un proxecto de goberno de coalición, á vez que convidou a incorporarse a el a "outras forzas" que queiran "sumar" nun executivo "progresista" que estea "liderado" polos socialistas.
Así mesmo, tamén puxo o foco en que esta "vontade de diálogo" xa "funciona" noutros lugares, como as deputacións provinciais da Coruña, Pontevedra e Lugo (gobernadas por socialistas e o BNG), así como en "moitos" outros concellos da xeografía galega, o que levou a vaticinar que "en Galicia haberá un goberno de cambio liderado polo PsdeG" a partir das próximas eleccións autonómicas.
