O candidato socialista á Xunta proclama que, "se hai mobilización masiva o 5 de abril", o cambio será "imparable"
VIGO, 17 Feb. (EUROPA PRESS) -
O líder do PSdeG-PSOE e candidato á presidencia da Xunta, Gonzalo Caballero, elixiu Vigo para iniciar unha rolda de contactos nas cidades galegas gobernadas polo seu partido, e puxo a cidade olívica como "exemplo de capacidade de xestión", cun goberno --liderado polo seu tío, Abel Caballero-- "referente das políticas municipalistas".
Tan só dous días despois de que o presidente da Xunta, Alberto Núñez Feijóo, presentase a súa candidatura oficialmente en Vigo, Gonzalo Caballero proclamou que esta cidade é a primeira da súa rolda de contactos porque "é un exemplo de como gobernan os socialistas".
Após manter unha reunión co alcalde e con membros da agrupación socialista viguesa, como Abel Losada, David Regades, ou Carmela Silva, entre outros, Gonzalo Caballero recalcou que Núñez Feijóo foi, durante os seus anos de mandato, "un inimigo político das cidades", porque "esqueceu" a importancia das urbes no futuro de Galicia.
"Non hai compromiso con Galicia se non hai compromiso coas cidades", recalcou o líder dos socialistas galegos, quen advertiu de que, para o PP, "Galicia é moito, pero vai a menos con Feijóo" polos seus recortes en sanidade, en educación ou pola falta de políticas industriais.
ABANDONO DE VIGO POR PARTE DE FEIJÓO
Así, após apuntar que Galicia necesita novas políticas de vertebración territorial e impulsar un crecemento liderado polos espazos urbanos, puxo o exemplo de Vigo, que para Feijóo estivo "relegada a un caixón". "Vigo avanza cun proxecto liderado polo alcalde (...), mentres que a Xunta dedicouse a pór paus na roda", apostilou.
A ese respecto, criticou a presenza do candidato á reelección, este sábado, na cidade olívica. "Veu a Vigo despois de abandonar a cidade durante 11 anos, para utilizala como trampolín electoral, despois de incumprir os seus compromisos", proclamou, á vez que lembrou que tivo que ser o Goberno de España o que abordarse a solución á crise do estaleiro Barreras.
Por todo iso, Gonzalo Caballero prometeulle ao rexedor da cidade, que, cando sexa presidente do goberno galego, terá nel a un "aliado" para "traballar polo futuro de Vigo e de toda Galicia".
"CAMBIO IMPARABLE"
Preguntado acerca das enquisas electorais, o candidato socialista á presidencia da Xunta, após lembrar que as sondaxes "dan horquillas de até 10 deputados", subliñou que "a mellor enquisa foi a que se produciu o pasado novembro", nas últimas xerais, cando máis da metade dos galegos, "optaron por forzas progresistas".
A ese respecto, Gonzalo Caballero advertiu de que, se o próximo 5 de abril hai unha "mobilización masiva" e alta participación nas urnas, "o cambio político será imparable", porque "hai un clamor para retirar" ao actual presidente galego. "Por iso Feijóo quere pasar no bico dos pés por esta campaña electoral, para non dar conta da desfeita que deixa", sentenciou.
"DEMANDAS HISTÓRICAS" DE VIGO
Pola súa banda, o alcalde da cidade olívica explicou que, no encontro de hoxe, entregoulle ao "futuro presidente da Xunta" unha lista coas "demandas históricas" de Vigo, "exactamente a mesma" que lle remitiu a Feijóo após os comicios autonómicos de 2016, e á que o líder do Executivo "non lle fixo nin caso".
O rexedor tamén se referiu ao acto de presentación de candidatura de Feijóo en Vigo, e criticou que o aspirante á reelección tivese o "descaro político" de facelo nunha cidade "á que condenou ao ostracismo".
Para Abel Caballero, hai unha gran "vantaxe" en que o seu sobriño sexa candidato porque "é de Vigo" e "xa non hai que explicarlle" as demandas da cidade. "Teño a confianza de que vai ser presidente, e transmitinlle ao que Vigo ten dereito, con todo o agarimo a outras cidades, pero non pedimos nada ao que Vigo non teña dereito", proclamou.
