SANTIAGO DE COMPOSTELA, 3 Dic. (EUROPA PRESS) -
A Confederación de Empresarios de Galicia (CEG) considerou que as prioridades para a Xunta nesta lexislatura deben ser a creación de emprego e a reactivación da actividade empresarial. Neste sentido, apuntou que o tecido produtivo necesita "un ámbito normativo e fiscal que favoreza a súa actividade e lle permita reforzar a súa competitividade".
A patronal galega cre que, para avanzar nestes dous obxectivos, o Goberno galego debe "dar continuidade ao respaldo mostrado cara aos sectores produtivos". "Á marxe dos problemas a todos comúns --escaseza de financiamento e caída da demanda--, cada un atravesa dificultades propias a resolución das cales pode verse favorecida se as empresas contan na administración galega cun colaborador próximo e sensible ás súas necesidades", subliña.
Así mesmo, avisa de que se a actividade empresarial non presenta "certo dinamismo" a recuperación económica e "a desexada creación de emprego" non se producirán.
A organización que preside Antonio Fontenla avoga tamén, nese camiño da reactivación económica, por "perseverar nos esforzos de fomento da internacionalización da economía e na súa aposta pola innovación".
No primeiro dos campos "rexistráronse xa notables avances", sostén, pois "cada vez son máis as pymes que queren aproveitar as oportunidades que ofrece integrarse no circuíto da economía global", pero "os apoios deben ser sostidos". Esta aposta, argumenta, "consegue os seus maiores réditos a medio e longo prazo".
En canto á innovación, destaca tamén que "necesita tempo para proporcionar o seu retorno", polo que anima tamén a proporcionar "uns recursos constantes".
Por último, a patronal pide que "os posibles axustes" do Goberno galego para avanzar na consolidación fiscal "deben concentrarse na propia administración, na súa estrutura e gasto corrente non produtivo, antes que no sector privado", que asumiu nos últimos anos "un severo proceso de control de custos para gañar en competitividade".
"De producirse este tipo de axustes poderíanse liberar, ademais, novos fondos que permitirían á administración galega reforzar o seu papel de dinamizador da economía da comunidade", sostén.
