SANTIAGO DE COMPOSTELA, 21 Ago. (EUROPA PRESS) -
O director xeral de Enerxía e Minas, Ángel Bernardo Tahoces, investigado por un suposto delito de prevaricación ambiental, non considerou "en ningún momento" a súa dimisión ao entender que "se están facendo as cousas con plena suxeción á legalidade".
A preguntas dos xornalistas nunha rolda de prensa, Tahoces destacou que está "convencido a nivel persoal e profesional" de que as actuacións desenvolvidas pola Dirección Xeral e polo Inega (Instituto Enerxético de Galicia) "axústanse ao ordenamento xurídico".
A demanda de cesamento da súa actividade foi requirida pola plataforma Salvemos Cabana e por membros da oposición, após coñecerse que o director xeral de Minas está a ser investigado por un suposto delito de prevaricación ambiental en relación co proxecto de San Finx, en Lousame (A Coruña).
Así mesmo, informou de que non coñece a data para ir declarar ante o xulgado. A principios de maio, o xulgado de instrución número 2 de Noia suspendeu a súa citación despois de que o letrado da Xunta presentase un escrito co que solicitou máis tempo para examinar as actuacións
