Critica o acordo para a reforma das pensións e cre que é "histórico contra os dereitos da maioría social"
SANTIAGO DE COMPOSTELA, 28 Ene. (EUROPA PRESS) -
O voceiro nacional do BNG, Guillerme Vázquez, cualificou este venres de "preocupantes" os datos da Enquisa de Poboación Activa (EPA), que mostran que Galicia pechou 2010 cunha taxa do 15,69%, e considerou que se debe ás políticas do Goberno central e a que o presidente da Xunta, Alberto Núñez Feijóo, está "ausente".
En resposta a preguntas dos xornalistas, Vázquez indicou que as cifras poñen de manifesto que "a perda de emprego" vai, no último ano ou ano e medio "a un ritmo bastante maior que o do Estado". "Os datos certifican que se incrementou notablemente o paro", insistiu e criticou que, ante as políticas de Madrid, hai unha "ausencia total de formulacións" por parte do Goberno galego.
O presidente galego, reprochou, está ausente "tamén fisicamente". "Dicíame alguén o outro día que tanto ten que estea como que non estea, porque o resultado práctico é o mesmo", dixo o voceiro da formación nacionalista.
Ademais, Vázquez referiuse ao acordo para a reforma do sistema de pensións logrado nas negociacións entre o Executivo central, a patronal e os sindicatos UGT e CC.OO. e riscouno de "inxusto e inxustificable". O responsable do BNG insistiu en que o "acuerdazo" terá especial repercusión en Galicia, polo elevado número de pensionistas, por ser a comunidade coas prestacións máis baixas e polo contexto de suba de prezos.
"Non sei que teñen que celebrar", dixo, en alusión aos participantes nas negociacións e a PP, que "parece que se vai sumar", pois "a única realidade" é que a idade de xubilación se eleva aos 67 anos e que "haberá que traballar máis tempo para ter unhas pensións máis baixas". Ademais, referiuse ao acordo para que as prestacións se calculen, en lugar de sobre os últimos 15 anos cotizados, sobre 25, suporá "unha redución do montante" que perciban os pensionistas.
"CONTRA A MAIORÍA SOCIAL"
O voceiro da formación censurou tamén os cánticos de que é un acordo histórico" e replicou que "se é histórico, o é contra os dereitos da maioría social". É, continuou "o nunca visto en 30 ou 40 anos". "Todos estamos a botar contas e dando saltos de alegría porque, por fin, imos poder traballar ata os 67 anos, imos cobrar menos pensións e moitos mozos non chegarán a percibilas", ironizou.
Fronte a isto, "miles de persoas dixeron alto e claro nas rúas de Galicia que non están dispostos a recortes inxustos e innecesarios", dixo, en alusión á folga xeral do xoves, convocada pola CIG. "É un exemplo de dignidade", afirmou e interpretou que significa que "hai un xerme que di que hai xente que non comulga con traizoar os intereses da maioría social". "Dígoo con todo o orgullo", proclamou.
