SANTIAGO DE COMPOSTELA, 15 May. (EUROPA PRESS) -
Integrantes do sindicato de Profesionais da Sanidade Pública Galega (Prosagap) iniciaron esta fin de semana desde o municipio lucense do Cebreiro a súa particular peregrinación para denunciar a "situación de precariedade e malestar" na que aseguran se atopa o persoal eventual da sanidade pública galega.
Nunha nota de prensa, trasladaron que teñen previsto chegar o vindeiro sábado día 21 a Santiago de Compostela cunha gran manifestación desde o Monte do Gozo até a Praza do Obradoiro.
O sindicato sinalou que levan xa sete anos poñendo encima da mesa a situación do persoal sanitario eventual, o cal definen como "o elo máis feble e precarizado" do sistema sanitario galego. Segundo relatan, este sería o sétimo ano consecutivo de mobilizacións que iniciaron cando "ninguén miraba para o persoal eventual", considerado de "segunda categoría".
Así mesmo, contextualizan a manifestación deste ano após recibir a sentenza do Tribunal Supremo que condena ao Sergas a pór solución a "as políticas de discriminación contra o persoal eventual" e, en concreto, a "outorgarlle a estes profesionais un dereito até agora negado: a carreira profesional".
Para Prosagap, a carreira profesional sería un complemento salarial que "premiaría a lealdade ao sistema e a dispoñibilidade dos profesionais". Até o momento, engaden, o Sergas "desentendeuse desta cuestión e dificultaría a súa aplicación no campo do persoal eventual".
