Ambas foron evacuadas ao Hospital Juan Canalejo da Coruña, unha delas en helicóptero medicalizado
SANTIAGO DE COMPOSTELA, 20 Abr. (EUROPA PRESS) -
Unha colisión frontal entre dous turismos na nacional N-651 á altura do concello coruñés de Paderne saldouse con dúas mulleres feridas que tiveron que ser excarceradas, xa que se atopaban atrapadas nos seus vehículos.
Os servizos de emerxencia tiveron constancia dos feitos ao recibir unha chamada dun particular sobre as 15,30 horas, o cal informaba de que dúas mulleres necesitaban axuda após chocar cos coches nos que viaxaban e quedar atrapadas.
Así, o Centro Integrado de Atención ás Emerxencias (CIAE) alertou ao 061-Urxencias Sanitarias, aos Bombeiros de Betanzos, á Garda Civil de Tráfico, aos membros de Protección Civil de Paderne e de Betanzos e ao servizo de mantemento das estradas.
Unha vez no lugar do sinistro, os servizos de emerxencia informaron de que foi necesario o uso de material de excarceración para liberar ás ocupantes de ambos os vehículos. Así mesmo, unha das feridas tivo que ser evacuada en helicóptero madicalizado e outra en ambulancia ao Hospital Juan Canalejo.
Ademais, segundo a información facilitada polo 112 Galicia, o accidente obrigou a cortar a circulación na vía debido aos traballos de limpeza e mantemento para restablecer as condicións de seguridade da mesma.
