SANTIAGO DE COMPOSTELA, 20 Nov. (EUROPA PRESS) -
O presidente da Xunta, Alberto Núñez Feijóo, chamou este sábado á "responsabilidade, mesura e sentido común" para "non poñer en risco" o sistema público sanitario e demandou tamén que "non se poña en dúbida, como o sistema de pensións".
Así o manifestou aos medios tras as declaracións realizadas por Leire Pajín este venres nas que advertiu ao Goberno galego que a elaboración do catálogo de medicamentos "non é unha competencia autonómica" senón do Ministerio, polo que velará "pola equidade co resto de comunidades autónomas".
Na súa intervención, Núñez Feijóo asegurou que "nun momento de extraordinaria dificultade" no que os organismos nacionais advirten das "dificultades económicas que está a pasar España", hai que racionalizar e priorizar o gasto público". Así, sinalou que non se debe "poñer en risco" un sistema sanitario "extraordinario" que "custou tanto tempo manter e conseguir".
Nesta liña, manifestou a súa convicción de que o Ministerio de Sanidade "será consciente das súas responsabilidades" e "traballará coas comunidades" para "manter a viabilidade do sistema", polo que desexou "sorte" a Leire Pajín na súa xestión.
Finalmente, o presidente da Xunta incidiu en que "facer viable, consolidar e garantir" o sistema sanitario público é "o obxectivo de Galicia", polo que "seguirán traballando" para que o sistema sanitario galego "sexa capaz de facer novos hospitais, novos centros de saúde e baixar as listas de espera".
